.~عرابجه في سويسرا.~

[~جغمه توت~]

مرآآآحب ...كيفكم


ابحكي لكم صفحه من صفحات حياتي شوي.."<<لحد ينحاش مناب مطوله!! المهم حنا عائله مكونه من ام واب وتمساحين كبار وثلاث سحالي وتمساح صغير وتحته سحليه صغنونه شديده البثاره!! طبعا انا اكبر السحالي ,المهم ابوي الله يحفظه رومانسي حييييل<<ماتركب صح؟؟//ياربيييييه وش دخلكم ابوي رومانسي,ايه وشسمه ذا وأمي شوي عربجيه وحنونه مرره ,حياتنا تقدرون تقولون عنها رتييييييبه,بس نداوم/نتغدا ننام نكتب واجباتنا نتعشى .....وهكذا~~~//

المهم مره من المرارير وحنا بالمدرسه قالت لي صديقتي ريم:جغمه؟وين بتصيفون فيه هالصيف؟؟(ياكرهها هي وذا السؤال يعني كل سنه ننطق في الرياض وغبارها وششش الجديد هالسنه )؟؟قلت في تميلح شديد :يوووه بنروح لسويسرا وانا ماودي؟؟؟؟ (عاد مشكله انها سألتني وفيه باقي الشله)انا على بالي ابستهبل مادريت الاالشله تفاعلو ومبروك وكذا,يوووه أنا وش هببت؟؟قلت بنفسي يله ابدبر لها تسليكه..,يله خل اتفشخر شوي واذا جت الصيفيه يحلها ربي/المهم يوم رجعت للبيت جال في خاطري سالفت صديقتي ريم والسفر؟؟؟وقعدت افكر<ليش حنا من بين العالم مانسافر برا بس جالسين بالبيت واذا مرره يعني تدلعنا رحنا اول العطله للشرقيه وبنهايتها لمكه
والطايف؟؟<</المهم جلست افكر وافكر ومن عمق التفكير فجأه صعبت علي نفسي ,ليه حياتي كذا وليه حياتي مليئه بالغلقه؟؟وليه اخوي الكبير ذاك اليوم هاوشني ؟؟وليه أبوي بس دايم يتاخر بالدوام ولا نشوفه كثير,,,وليه وليه,,,وبديت اتذكر سوالف لها قرون مندثره وبالقوه ابخلي حياتي جحيم//وتدريجيا بديت اصدق وبدت الدموع تتجمع بمقلتي المجروحه //وبينما أنا اغتصب الغصه لتدر معها شلالات الدموع سمعت صوت جهوري مزعججج ينادي:جغمممممممممممممه!!! تعالي ووجع ابلعي غدا ,والله مانحتريك بنبدا ناكل!!(هذا التمساح الكبير اللي هاوشني اعلاه)!!المهم أنا هنا صعبت علي نفسي مررره وقدرت اسحب شهقه طويله الامد من اقصى حلقي((وااااااااعههااااهاهاهاهاهاهاهاها))//المهم قمت بسرعه اركض للباب وصكيته وقفلته ووقفت وراه(حسيت اني بمسلسل خليجي ,عاد استانست صياح وتسكيرت باب ومشاهق...اكتمل الاكشن)وهذا كله دعم تاثري باني انسانه محطمه وحياتي عذاب وكذا
المهم شوي واسمع خطوات امي جايه لغرفتي؟؟ومار انز؟؟ماتعودت اصيح ابد يمااا اخاف احد يشوفني وينقد علي؟؟ واقوم بسرعه لحمامي واغسل دموعي بسرعه وانشف وجهي واقعد اسوي فيسات تضحك عند المرايه عشان ما انكشف المهم سمعت امي تفتح الباب ولاه مقفل واسمعها تقول :جغمه يما وراك ماتجين تتغدين؟؟بس انا من الروعه مارديت قالت:يما حبيبتي افتحي الباب؟؟//انا هنا خلاااااص انهرت<<قرويه ماعمرها سمعت حبيبتي بحياتها؟؟صدقت انها مدلعه!!/واقعد اصايح واشاهق يوم شفت امي مصره اني افتح,قلت يابنت ليش ما تروحين وتسوين انك محطمه كود انهم يرحمونك ويسفرونك برا؟؟ واروح افتح الباب يوم شافتني امي قالت هو بسم الله وش فيك!! تصيحين؟؟انا نزلت راسي وفي تلك الاثناء سقطت دمعه يتيمه من عيني على خدي وتدحرجت ببطء نحو فمي (بيني وبينكم وقتها انا مستحيه من امي هذا كبري واصيح)المهم أمي بعدي تضايقت وقالت لي وش فيك؟؟انا قلت:أنا يما متضايقه حيييل يعني كل الناس يسافرون ويطلعون وحنا بس جالسين بالبيت ؟؟قالت:بآآآآس!!هذا اللي مصيحك!!<<ترى وقتها ابد ماتفشلت /قلت لا مو بس هذا؟اليوم البنات قاعدين يتطنزون فيني يقولون انا قراويه ومانسافر برا قالت الا كل صيفيه نوديكم لمكه والطايف؟؟,,قلت ايييه مكه والطايف موب برا انا اقصد برا المملكه,,امي فجاه انقلب لونها وشو!!!برا المملكه؟؟استغفر الله؟؟يابنت خلي الهبال عنك وقومي نتغدا الاقيهم خلصوا الغدا عننا؟؟//قلت لااااااااا مابي خلاص ما ابي آكل ابي اموت وارتاح(متأثره بسالفه المسلسل الى الان) انا قلت هالجمله وأمب بتطلع بس سمعتني رجعت؟؟؟وش قلتي؟؟؟,,قلت:هاه,ولاشي ذا يعني مابي غدامناب جوعانه,رجعت امي وقالت بكل حنيه:شوفي بنيتي اذا طاع ابوك انا ماعندي مانع؟؟؟؟ انا اول حسيت امي تستهبل او مسويه معي الكميرا الخفيه؟؟ بس يعني لا كل شي الا سمعي أنا ميه بالميه خصوصا على الاشياء الجميله المهم قمزت وحبيت راسها وقعدت ادعي لها//وقلت يالله خل نروح نلحق عالغدا.....






يتبع...تعبت شويات وراجعه..

 

[~جغمه توت~]

المهم مالكم بالطويله..


نزلنا انا وأمي نتغدا(طبعا السفره عباره عن دمار شامل والعائله متسدحه حولها نايمين!!

حشا وش ذا المجاعه والله لو انكم رايحين الصومال مو للمدرسه؟؟ رحت للمطبخ وأخت لي

صاموليه وحطيت فيها جبن المراعي سايل وخيار وصبيت لي عصير الربيع مشكل...

.......................


في المساء..


رحت للوالد جالس بالحوش يقرى الجريده ويتقهوى الشاهي,<<قايله لكم ابوي

رومانسي؟؟رفع راسه قال هلا والله يبا كيف المدرسه اليوم؟قلت آآآآآآآآآآآآآههه الحمد لله زينه

وانا اناظره بطرف عيني ابيه يسمع الاهه واسوي يعني ترى بالي مشغول وضايق صدري؟؟

وفجاه خشيت بالدور (على بالي بس جادع الجريده وجالس يتفرج علي) سويت نفسي سرحانه وانظر

للبعيد واتنهد..وانزل راسي بانكسآآآآر,,,المهم حانت مني التفاته نحو ابوي؟؟رحمته قلت الحين

اكيد انه (يبكي بصمت)؟؟//واثريه ماجاب خبري وقاعد يقولب بالجريده وهو يهز راسه؟؟

قلت بس يابنت قوليها على بلاطه وربك يحلها؟؟بس مآآآش كايده قعدت افكر وافكر هاه وش

اسوي؟؟المهم خطرت علي فكره جنونيه بس مدري موب واثقه من النتيجه ؟؟المهم قربت عنده وقلت يبآآ

ابي اقولك شي؟المهم من دون يرفع راسه قال هاه وش تبين ؟فلووووس وين مصروفك تو الناس الاحد اليوم؟؟

قلت يبا وش دعوه؟يعني ما اسولف معك؟؟ المهم رفع راسه وقال:وش بغيتي جغمه؟؟

قلت :والله فيه موضوع مهم لازم انت تعرفه بس مدري كيف اقولك؟؟ قال:وشو؟طبعا ابوي غير قعدته

وسكر الجريده وملى بيالته شاهي؟؟وش فيه يبا متطاقه انتي وزميلاتك بالمدرسه؟؟

وش قالوا لك سلطان؟؟ههههه قلت لا يبا الله يحييك حنا بنات مانتطاق قال:اجل وش فيه؟قلت شف يبا انا

ترى اقول هالكلام بس عشاني خايفه على حياتنا مع بعض؟؟

ابوي::

انا:ايه يبا انا اليوم بالمدرسه جتنا اخصائيه اجتماعيه مشهوره ودايم تجي بالتلفزيون..

ابوي: طيب..؟

انا:ايه وهي قعدت تكلمنا عن كل شي لازم يصير بالبيت عشان العائله تصير سعيده ومسروره
ابوي: ...طيب...؟

انا:ايه وهي عاد قالت كلام كثير حنا الحمد لله نتبعه بحياتنا بسسس فيه شي حنا مانسويه واذا ماسويناه

تصير حياتنا مهوب سعيده؟؟ويصير فيها مشاكل؟؟


ابوي:.... ...هآآآه؟؟ووشو هالشي..؟

انا:... اممم هذا هي تقول ان الام تواجه ضغوطات بالحياه وتدريجيا تصير تحس بملل ولازم يصير لها شي يرفه عنها...

ابوي:.. الام؟؟...انتي تقصدين امك؟؟وش فيها؟؟

انا :والله يبه أمي مسكينه بس تطبخ وتنفخ وتدرس ذا وتلبس ذا هي ماقصرت معنا وانا اقترح عليك نسوي لها مفاجأه؟؟

ابوي: <<جازت له الفكره,,وش تقترحين نفاجاها به؟

أنا :يبا انت ماشاء الله عليك ماخليت عليها قاصر هدايا وكذا هالمره نبي شي غييير؟؟

ابوي: طيب وش نجيب لها؟؟

أنا:بديت احس ان خطتي بتنجح؟؟ قلت يبا الله يسلمك وش رايك بسفره محترمه تغيير جو ووناسه ومنها احتفال بزواجكم انت وامي جددوا ايام شهر العسل...

ابوي:... اهههههه وشو يا بنيتي عيب عيب //المهم حسيت ابوي راح وطي مع الفكره..

وانه ممكن يلين بس تدريجيآ

أنا:ايه يبا بس انت خلي كل شي علي وانا اخلي امي تحبك اكثر واكثر؟؟ <تخبرون ابوي رومانسي ويحب الحركات الزينه..,

قال:خلاص ابشوف ان شاء الله عاد انا قلت ايه يبا خذ وقتك عادي باقي شهر على الاجازه؟؟

ابوي:وش دخل الاجازه؟؟

انا:بلعت ريقي,وش قصده؟؟يعني بيجحدنا بالبيت زي ذيك المره يوم يروحون للشرقيه هو وامي بس؟؟

قلت لا بس عشان امخمخ لكم على شي سنع يخلي امي ترجع عشرين سنه ورى...

ابوي:....ايييييه ....أهههه اللي تشوفينه حبيبتي؟؟؟؟؟؟ وش بلاه ذا الشويب ضاعت علومه..,

المهم هو قام ينام وأنا جلست في الحوش افكر وش ابقول له بكرى ووشلون ابقنعه انه السفره تكون برا....



يتبع...

 

[تباري السآس]

بس كذا جيت اخرب ...ومااخلي الموضوع متتابع..>>بزر بثر..

 

[~جغمه توت~]

مرآحب وحياكم"



المهم اعزائي مرت فتره الاختبارات على خير وكلنا نجحنا بس التقادير نصها في العنايه المركزه!! ,كان ابوي جالس هو وامي يتقهوون المغرب ورحت اتقهوى مهعم <<احلفي!!
جلست وصبيت لي فنجال وقعدت أناظر ابوي واثره يتبوسم؟؟؟وش فيه ابوي لا يصير بس قطعت عليهم جو؟؟//قلت يبا كيف الحال؟؟ناظرتني امي وقالت:وش هالنشاط اللي جايك اليوم غريبه قايمه قبل العشا؟؟<<امي دايم تفشلني//قلت شوفي يما ترا خالتي مزنه داقه تو وقلت لها امي بتتقهوى وتكلمك؟؟قالت :لييييه ماقلتي لي وجع ياخزياه باختي؟؟قلت :الله اكبر كل يوم تدق وش الجديد يعني ؟؟سفهتني امي وقامت دخلت جوا تكلم خالتي//أنا ناظرت ابوي وقلت يبا ترا انصب على امي خالتي مادقت؟؟ بس ابكلمك ومابيها تسمعني؟؟ ابوي: والله انك حماره مدري على من طالعه؟؟

أنا: هذا جزاي ابي اضبطك؟؟

ابوي : وش تضبيطه؟؟انا: لا خلاص منيب قايله انت ما تقدر تعبي؟؟

ابوي:اخلصي علي وش عندك؟؟

انا:ابد تذكر ذيك الاخصائيه اللي كلمتك عنها؟؟

ابوي :ايه

انا:جتنا مره ثانيه للمدرسه,وتقول الله الله بامهاتكم ,لا تنسون وصيتي؟؟

ابوي :وش وصيته؟//انا :ياربيه لا يصير نسى بس؟؟قلت:يبا هماي قلت لك بنسوي لامي مفآجاه؟؟

ابوي:ايه ايه,وش صرنا بنروح الطايف؟؟//انا لااا هي قالت التغيير لازم يصير جذري ولازم يكون برا المملكه؟؟

ابوي:

انا:ايه يبا الحين الناس تطوروا وصاروا يطلعون اهلهم برا المملكه؟؟شف ابو حمد جارنا؟؟وابو ناصر بعد

وبعد سعود المحمد كلهم يسافرون برا ويدلعون حريمهم ؟؟هذا وانت احسنهم واكشخهم

ابوي:والله مدري يابنيتي...

انا:لا لا يبا مالك حق انت مال وجاه وزين<<<مدري وش دخلها؟؟//يعني انت اولى من غيرك..؟

ابوي طيب أنا ما اعرف شي عن السفر برا ؟؟

انا ما عليك انت بس وافق وكل شي انا ابعلمك اياه..

ابوي :خلاص ابشوف لنا رحله للكويت؟؟((كل هالعزر وبالاخير الكويت))

انا :لا يبا الله يصلحك وش الكويت الدكتوره تقول لازم سويسرا؟؟؟؟؟؟؟؟

ابوي: ما كنك تبالغين؟؟

لا بالعكس انت بس اسمع كلامي وشف

ابوي:طيب الله يعين بس

انا :يعني حنا ماشاء الله علينا بس تسعه والحجوزات بتصير سهله ان شاء الله

ابوي: لا وش تسعته انتم بتقعدون عند خالتكم مزنه؟؟؟؟؟؟؟

انا:لا يبا مايسمحون الا لازم معك عايله<<وين داخلين غرناطه!!

ابوي:ايه معي امك تكفي.؟؟

انا: لا يبا هم العائله عندهم يعني لازم بنات وعيال وكذا مو عندنا بس حرمه تكفي؟؟؟؟شف جيراننا كلهم ياخذون اهلهم كلهم عشان مايدخلونهم الدوله الا بالعائله كلهم ..

ابوي: مااقتنعت ابسال واشوف؟؟

انا :هاه يبا هههههه هذاك اول يدخلون بس الحين لا انا متاكده كاتبينه بالنت؟؟

ابوي بس انتم كثار والماديه ماتسمح

انا :يبا قعد العيال وروان واروى موب لازم يروحون بس انا وانت وامي ومشاعل؟؟

قال:ليه وانتم وش زايدكم عنهم؟؟

انا :العيال هم مايبون اسالهم والبنات صغار حسافه موب متذكرين اذا كبروا هم يروحون وحنا نجلس؟؟

ابوي:ابشوف نعقد اجتماع ونشوف وبعدين نقرر تروحون ولا لا؟؟

انا:خلاص اللي تشوفه <<ادري ان اخواني الملاقيف بيقولون انهم بيروحون بس عشان يجلسونا

.................................................. .



من بكرا بعد الفطور رحنا للمقلط(مقر الاجتماعات)



ابوي :شوفوا أنا قررت أننا هالصيفيه نسافر برا بس الماديه ماتسمح نروح كلنا من بيجلس ومن يبي يروح؟؟؟


سلطان:<<الكبير::يبه انا ابروح؟؟

محمد:<<اللي بعده.,, ووي بتروحون؟؟

ابوي :سويسرا؟؟

محمد:وشي سويسرا؟؟فيها بحر؟؟

ابوي :مدري؟؟اذا رحنا نشوف؟؟

انا :لا لا مابها بحر حنا دارسينها بالجغرافيا كلها نفود؟؟

محمد:ياااااوك لالا ياشيخ مابي اروح انا عطني فلوس نتقاط مع عيال عمي ونروح الشرقيه احسن؟؟

ابوي:ايه اشوف,وانتم ياروان واروى فهد؟؟

فهد:<<الصغير, الا ابي اروح؟؟

أنا :وشوله تروح ترا عيال خالاتي بيجتمعون عند جدتي وبيجيبون دباب ابراهيم ولد خالتي دلال؟؟

فهد:اححححححلفي!!

انا :والله يا غبي بعدين ترا بيقعدون يحرونك

فهد يناظر امي؟؟:يما ودي اروح لبيت جدتي تكفين !!

أمي :ابكلمها واشوف أنكانكم ما ازعجتوها بكرا بخليكم تنامون عندها اذا رحنا..

روان:يما وش زوده هو حتى انا ابي اروح بيت جدتي ؟؟


****************



المهم صرنا بنروح(امي ابوي سلطان<<موقعه غلط احسه بينشب لنا هناك!!,وانا ومشاعل..

المهم سوينا الحجوزات حقت الطياره والفنادق وبقى يوم على السفر..

بغرفتي//مشاعل:جغمه!!وش بنلبس هناك؟؟

انا: عادي اباخذ بيجاماتي همانا بنلبس عبايه فوقها

مشاعل:وش عباته يله بس انا موب لابسه عباه؟؟

أنا :هههههههاي حلوه موب لابسه ترى سلطان بيجي معنا

مشاعل:ايه وش اسوي له انا توني صغيره اللي باول ثانوي قصر مايلبسون!!

أنا :ايه طسي تفاهمي معه وخليني اجهز شنطتي؟؟

يوم طلعت مشاعل قلت ؟؟والله فشيله سويسرا وعباه وش السواه؟؟
رحت لامي وقلت يما بنلبس عبايات هناك؟؟

امي:الله لا يكشف سترنا ايه بنلبس بس تقول زميلتي منال البسوا عبايات ملونه عشان شكلكم مايصير شاذ؟؟؟

أنا :بس يما اخاف يحسبوننا ارهابيات ولا شي؟؟

امي/والله عاد بكيفهم؟؟,

انا طيب منين هالعبايات الملونه؟؟

امي:انا وصيت اختي مزنه وهذاها مرسلتهن مع سواقهم؟؟

وصلن العبي وراهن حقت امي بيج وانا ومشاعل رمادي فاتح...

اخت عباتي ورحت احوس بدروجي وش الشال اللي بيناسب هالرمادي الغبي؟؟

المهم لقيت شال وردي ورمادي قلت يالله يناسب معه...

عاد انا بغرفتي اسمع مشاعل تقول:يماااااا وش ذا العبايه اللي تفشل ,مابي ابي عبايه فوشيه؟؟

وش ذا الذوق الخايس؟؟لو فكرت بس تفصل عبايه فوشيه تبريت منها

المهم وانا في غمرت ترتيباتي جاسلطان وفتح الباب:هيه جغمه قومي حطي لي كم غيار وجلابيه معتس بالشنطه؟؟؟؟؟؟؟؟؟ وشو؟؟؟معي!!!؟؟؟؟؟؟

سلطان:اييه بشنطتس مالي خلق ازقل شنطه لي لحالي كلها اسبوعين وجايين وانتي شنطتس كبر قريح!!

انا:لااا شنطتي لي لحالي؟؟فيها اشيائي الخاصه مابيك تشوفها

سلطان :طيب عندتس شنطه فاضيه؟؟

أنا مدري من عينني مستودع العائله الرسمي!! كل من بغى شي جا يدور عندي!!
قلت ابجيب لك من حقات ابوي وتعال طلع اللي تبي انت منيب قاعده احوس وبانهايه مايعجبك شي؟؟

جبت شنطه ورحت لغرفه سلطان حطيت الشنطه على السريروقلت يالله وش احط لك؟؟

قال:هذولي.....واشر على كومه ملابس داخليه وسراويل سنه وبيجامتين نوم؟؟

أنا بس هذي!!

سلطان :تستهبلين انتي.؟سويسرا واروح بس بذولي؟؟

انا :ايه اشوا اجل وين الباقي؟؟

سلطان :شوفيهن بالارض,وهو يحوس بالمكتبه يطلع الآي بود ونظاراته..

نزلت راسي واشوف ملابس عباره عن بدل رياضه,وحده للهلال,والثانيه مدري بس البنطلون اسود والتي شيرت مخطط عنابي واسود؟؟والثالثه على اساس الحين رسمي وكشخه حاط بدله المنتخب وبنطلون جينز؟؟؟

أنا قلت:سلطان؟؟؟؟وشش ذا

أنت بتخليهم يحسبونا بنقاليين لقولهم قرشين,أنا داخله على الله ثم عليك ان تغير هالتكميلات ؟؟

سلطان: وش تبين انتي؟؟//ماعندي الا ذولي؟؟

انا :ياخي خذ حقات محمد لو ثلاث وتعاقبهن؟؟

سلطان:لا لا حقات محمد وسيعات علي ابصير كني معلاق,,.انتي معليتس مني ابلبس اللي ابي

المهم طلعت وخليت يحوس بخلاقينه ورحت اشوف شناطي ووش ناقصني..,

 

[~جغمه توت~]

متابعين ولا ابلع العافيه؟؟

 

[غموض]

متابعين متابعين

 

[مدينة العطر]

معك بس حنا ساكتين حتى لانقطع حبل افكارك

والله قاريتها من البارح ودخلت جو معكم وودي أشوف أخرت سفرت السحالي والتماسيح والام العربجيه

 

[$ جـــوري $]

كملي كملي ..

ماشاءالله عليك على ذا الوصف صرت ادل ببيتكم ..

جغمه اذا ضيعتي موضوعك بتسعه تلقينه مثبت فوق ..

وناسه .. فيه شي حلو نتابعه << ذبحتكم اللقافه

 

[~جغمه توت~]

جوري شوكرن على التثبيت حسيتني مهمه



.

.

.


في الصباح الباكر...7:am صحيت وأنا مو مصدقه أننا اليوم بنروح لسويسرا غسلت وجهي وفرشت اسناني وسويت تمارين الصباح...؟؟ ورحت اسوي الفطور مفاجاه لاهلي..

دخلت المطبخ وسلقت بيضوحطيت المعلبات وقطعت خيار وطمام وسويت شاهي منعنعوجيت اطلع ,الا امي تنزل من الدرج ..

أنا:صبحتس الله بالخير يما

أمي :هلا صبحها الله بالنور والسرور وش مقومتس هالحزه؟؟

أنا :مدري مشتانه مع السفر مرررره قلت يالله نقوم بدري ونكمل اللي ناقصنا الرحله اليوم الظهر اخاف مايمدي..؟

أمي:والله من قل الصبر لوها المدرسه كان ماتلحلحتي ابد..؟؟

أنا: اقول يمآآآ تراي سويت الفطور

امي:هههههه عوافي كودنا دايم نسافر عشان تصيرين شقرديه؟؟

المهم نزلت امي وراحت المطبخ وانا لحقتها يوم قربت منها واشم ذيك الريحه.. أنا:يمااااااا

أمي:ناظرتني بريب؟؟نعم//أنا:لا تقولين انك متحنيه؟؟

أمي بسرعه حطت يديها قدام وجهي :ايييه شوفي وش زينه ناقع

أنا:لاااااا يمه وشوله الحنا حنا بنروح لسويسرا موب رايحين لمزرعه عمي سليمان!!!

أمي : وتبيني اروح وظفوري بيض يضحكن؟؟

انا: بديت افكر جديا بالغاء الرحله والتوجه مباشره الى بيت خالتي مزنه والقرقه مع بنتها نوف؟؟

أمي:يله روحي صحي ابوك واخوانك نبي اذا صلينا الظهر نمشي....


أنا:ارقى الدرج واتحلطم؟؟أما حنا وش تحس به امي!!//وقفت بنص الدرج وقعدت اصوت(يباااااا//سلطاننن///هيييييييييييييه قووووووومو افطروا بسرررررعه فاتتنا الطياره!!


وانا نازله اسمع ملابخ ومدابج...بسم الله سكنهم مساكنهم!!,,شوي يويق علي سلطان ووراه مشاعل ومن خلفهم ابوي ..

وفي صوت واحد:كممم السااااعه؟؟

انا: الساعه سبع ونص..

سلطان:الله يقلع ذا الوجه (يتطنز)>فاتتكم الدياره //رجع لغرفته وهو يقول لا تقوموني الا احدعش!!

يا كرهه هو وهالنفسيه...


الموهم بعد الصللاه راح ابوي يودي اخواني لبيت جدتي وحنا نحط اغراضنا عند الباب...

سلطان:يما وين بدلتي اللي ابلبسها بالطياره؟؟؟

أمي على سريرك

سلطان:جغمه روحي جيبيها واذا طلعتي قفليها لا يحوس اغراضي هالدب>>(محمد اخوي اللي بيروح الشرقيه)

الله عاد ياذا الاغراض ابحلف ان غرفه محيي سواق الجيران احسن من غرفتك كلها كور وتلفزيون وسوني واسلاك!!

أنا:رح انت البس بغرفتك عسى بعد بتغير عندنا انت وهالعصاقيل الشهب!!

سلطان:رمقني بنظره تهديد ووعيد ورقى؟؟

المهم لبسنا عباياتنا الملونه وفوقها عباياتنا السعوديه <<ابد ماطلعنا منفخين تقل خياش!!

عاد جاء ابوي وركبنا السياره ومشينا


ابوي:

امي:

سلطان:

انا ومشاعل:


..................................


في الطريق نسولف انا وشعوله وسلطان يتطنز بكلامنا وامي طاقه الهوجاس وابوي متحمس...


سلطان:جغمه نقابتس رصاصي؟؟؟

انا: على الاقل احسن من بدله الهلال؟؟

سلطان:ههههههههههاي والله متحمس اروح بس عشان اشوف اشكالكم ...؟؟اول كنتو اسود وابيض الحين حركاااااااااات ملون!!

أنا : ياربيه بس يازينك ساكت انت وهالقذله..

امي:ياجماعه اذكروا الله هذا اللي رايحين يستانسون...؟

أنا :هو يتطنز علينا هو وخشته

أمي:خلاص اسكتوا لا نرجعكم؟؟؟؟؟<<على الحفه مايبيلهم هالاهل!!

مشاعل:جغمه ماعليتس منه شوفي تراني انا ابقعد عند الدريشه بالطياره؟؟

أنا:يله بس كل وحده لها دور

مشاعل:طسي انا حميتها قبلتس؟؟؟

أنا:ايه خلاص بس لا تقعدين تفشلينا كل شوي شوفي وماشوفي وبعدين لا تقولين دريشه قولي شباك؟؟

المهم وصلنا للمطار وخلصنا الاجرائات بشق الانفس.. وبغينا مانروح يقولون تاخرتوا


وحنا جالسين ننتظر رحلتنا...

أنا:يبا شف كل هالناس ترا بيروحون لسويسرا..؟

أبوي: طيب داري!!

أنا: ايه يعني شف كل الناس الحين صاروا يروحون برا, وشكلهم متعودين مو مثلنا شف خشه سلطان تقول عمره ماعتب باب بيته..؟؟

سلطان:ايه انتي بس غطي خلاقينك اللي تسحب

أنا :وانت تكفى رح بدل هالعامل بزبيرياتك زنوبته اكشخ ...

مشاعل:هيه تكفون اسكتوا فشلتونا...؟؟

أنا:اوخص عاد ياللي بتفصل عبايه فوشيه!!!


سلطان: وشي فوشيه؟؟

أنا:هذا لون من الوان البنات اسمه فوشي؟؟وهو شكلهم خالطين وردي مع احمر؟؟

سلطان:طيب اسم اللون ماله علاقه باللون؟؟كان سميتوه زحمر؟؟؟

أنا ومشاعل:نناظر بعض الحمد لله على العقل...

.

.

.

 

[غموض]

8 8
ما كتبتي يتبع ؟؟ << واضح انها منسجمه
عجبني اسلوبك ما شاء الله عليك
إذا كانت القصه طويله حددي ايام تنزلين لنا فيها اجزاء << وش دخلك انتي
مجرد إقتراح

 

[$ جـــوري $]

فاتتكم الدياره

هههههههههههههههههههههه
هههههههههههههههههههههه
ههههههههههههههههههههه

الحمدلله فيه ناس غيرنا يتكلمون بذا اللغه ..

<< متابعه بحماس ..

 

[~جغمه توت~]

حيآآآآآآآآآآآآآآآىكم جميعا


غموض والله مدري قد ايش بتجلس هالقصه ابكتب الين تقضى سالفتي

وأنا اختس مالي وقت محدد اعلمكم فيه بس ان شاء الله كل يوم ابنزل جزء

 

[~جغمه توت~]

.

.

.

.


في الطياره..



طبعآكل العائله اول مره تركب طياره كلن جلس بكرسيه وربط حزامه وقرى آيه الكرسي

مشاعل:شكلها ماتخوف

أنا:ياذكيه تحسبينها الحين تمشي؟؟وشو لا يصير باص مدرستكم بس؟؟

مشاعل: انطمي ادري انها مامشت ,الله اكبر تقل عاد مقطعك كثره السفريات بالطياره؟؟

أنا:ترى اذا ما احترمتيني ابقوم اجلس عند سلطان واخليك لحالك..

مشاعل: بشويش تحسبني ما اسمع:ايه طسي!!

أنا:قدرت شعورها وفوتتها لها

سلطان كان جالس بالكرسي اللي قدامنا على طول وامي وابوي ورانا...سلطان التفت علينا

سلطان/تخيلوا اول ماتقلع تطيييح

أنا ومشاعل/وجع بسم الله علينا..

سلطان:صدق فكروا بها يعني وشلون تطير هي لحالها يعني احتمال سقوطها كبيييييير..

مشاعل بدت تصيح وتقول::جغمه حنا بنموت!!

أنا:اسكتي وتعوذي من ابليس وش تطيح وين حنا فيه ,بسريلانكا ؟؟طيارات السعوده احسن طيارات

وبعدين وفري هالصياح الين تقلع ارحمي أذاني على ذا النشاز

المضيفه:اعزائي المسافرون نرجوا استعدادا للاقلاع بربط الاحزمه و..........

بدت الطياره تتحرك وحنا نترقب وش بيصير المهم زادت السرعه شوي شوي وحنا قلوبنا

ترجف قلت كل الادعيه والاذكار وما تيسر من القران الكريم!!وتدريجيا تبدأالطياره بالاقلاااااع

مشاعل:يمااا يماااا ياربيه نبي نطيح ,وراها ذي مايله يمااااع..

أنا:متمسكه بالكرسي بقوه يارب يسر ولا تعسر لطفك يارب....

سلطان: الله ياسلااام تصدقون كني راكب قطار الموت حق البزارين؟؟؟جغمه تتحدين افك حزامي؟؟

أنا: وش علي منك لو تبي تطب من الشباك بعد!!

سلطان التفت علينا:ههههههه خايفين!! والله القرويات؟؟ قرب ودف مشاعل من يدها :مشاعل طحتي خخخخخخخخخخ

مشاعل:يمااااا شوفي سلطان


....................................

استقرت الطياره بالجو وجت المضيفه معها عربه العصاير ...

المضيفه:شو بدكن تشربوا؟؟

أنا:سويت اني متعوده على الطلبات والدلع:أمممم انا ابي كوكتيل طبقات؟؟

المضيفه: شو طبقات ؟؟عندنا كوكتيل ساده مو طبقات وبرتقال وتفاح ومنقا شو بدك؟؟

أنا:ياشين التفلسف ليتني قلت بس برتقال//قلت:أمم احم صبي لي منقا

مشاعل:ههههههه تفشلتي؟؟

أناعلى طول التفت للمضيفه وقلت :اختي ماتبي شي شكرا.

مشاعل :بشويش :هيه انتي خييييييير ؟

انا:ايه عشان تضحكين علي مره ثانيه

وجلست اشرب عصيري واناظر مشاعل:يازينه شكلهم يجيبونه من فرنسا

مشاعل: انطمي بس..

انا:سلطان وش رايك بالعصير؟؟

سلطان :ماصل شايفها وهي تصبه عصير سيزر؟؟


مشاعل:


.....................................


غفيت لي شوي حوالي ساعتين ومار اقوم وكل اهلي نايمين ناظرت الساعه :يوه اذن العصر

ماصلينا رحت لدوره المياه(تكرمون) وتوضيت والله حركات كريم وعطر طلعت وانا ماشيه الا

اسمع صوت رجال يصلون واتبع الصوت واثر فيه غريفه صغيره يصلون بها الرجال هم سلموا

وبدوا يطلعون واثر فيه حرمتين دخلوا فيها وكبروا قلت يمكن قضوا الرجال وجا دور الحريم صليت ورحت

لمكاني التفت على ابوي:يبا قم صل يمااااقاموا وراحو يتوضون جيت اجلس بس شدني شي؟؟

ناظرت يمين يسار هو حنا غيرنا طيارتنا؟؟؟ وين الحريم السعوديات؟؟ مابه احد

لابس عبايه؟؟المهم وانا قاعده اتساءل شفت وحده سبحان من خلقهااا قمررررررر وقفت والتفتت على اللي معها:عنود صليتي؟؟

انا: فركت عيوني ورحعت فتحتها

هي:ايه ايه انا صليت شوفي بابا وماما؟؟

انا: يعني ذي سعوديه؟؟


على طووووووول ضربت مشاعل على راسها:قومي قومي لا يفوتس؟؟

مشاعل:وش تبين ياربيه حتى بالطياره مزعجه

انا :قومي شوفي سعوديه فاتشه؟؟

مشاعل:بسرعه قامت تتلفت وينها وينها؟؟

انا:هذيك اللي لابسه اصفر..

مشاعل:امااا وش دراك؟

انا:يختي سمعتها قبل شوي تتكلم؟؟

مشاعل:يا حظها مالبست عبايه؟؟

انا :ماتلاحظين كل الحريم ما عليهم عبايات الا حنا وهذولاك اللي بالاول واللي وراهم؟؟لا لا فيه بعد عند المصلى ناس عليهم عبايات

سلطان :التفت علينا ايييه انا شايفهم يوم تحروا الناس نايمين فصخوا عباياتهن قليلات الحيا

انا:انت شفتهم؟؟ يا خزيااه انت ما تستحي؟؟

سلطان:اقول على تراب بس هن اللي شايلات عبيهن

مشاعل:ايه حتى حنا بنشيلهن بس الين ينامون الناس مره ثانيه؟؟

سلطان: وشوو لا يطري لتس بس لا اتوطى غاربتس

مشاعل:موب على كيفك ابقول لابوي ..



.

.

.

.


يتبع

 

[~جغمه توت~]

.

.

.


المهم وصلنا لمطار سويسرا وبدوا الناس يفكون حزاماتهم ويزبطون شناطهم ,مشاعل التفتت علي جغمه؟؟ وشلون بنفصخ عبينا السود؟؟

انا: عادي بالتدريج اول شي النقاب وبعدين اللف وبعدين العبايه؟؟

مشاعل:اخاف يشوفوني؟؟

انا:والله مافهمنا لتس انتي,حين تبين تفتشين وحين ماتبين احد يشوفتس ؟؟

مشاعل:يماا وشلون نفتش؟؟

امي :اصبروا لين ننزل للمطار نروح للحمامات ونغير؟؟

انا:اجل وشوله نلبس من البيت ؟؟مسوين زحمه على الفاضي؟؟

جيت ودخلت بالكرسي اللي عند الشباك وقلت لمشاعل تغطي علي وشلت عبايه السعوديه ولبست حجابي الوردي وتلثمت فيه..وتمت العمليه بسلام

مشاعل:يوووه تغيرتي!!

انا:يله تعالي اخلصي قبل يفتحون الطياره وتبدا الزحمه؟؟

تبادلنا الاماكن وجلست تلبس حجابها وتلثمت مشاعل:خلاص وخري كتمتيني؟؟؟؟؟؟؟؟

التفت عليها ابهوش: وشششش ذا الحجاب؟؟مالقيتي الا فسفوري؟؟

مشاعل:وش عرفتس انتي بالفنكي؟؟

انا:ارحمينا يا فاكمه عصمان؟؟؟عساتس بس جايبه غيره؟؟انتي بتخلين الناس غصب تناظرنا؟؟

مشاعل:خلااااص ذي ماتمل من التحلطم!!

انا:يما غيري هنا..

امي :والله منيب قاويه انزل راسي ورجولي,ابغير اذا نزلت؟؟

أنا:لا لا تعالي انا ومشاعل نغطيتس بس غيري هنا بيتروعون مع ذا الاسود
جت امي وغيرت ولبست حجابها بيج وبني ومعها نقاب بني لبسته فوقهن!!

سلطان:ورى ماجبتوا نقابات زي امي!!

أنا:وشوله ذا يكفي

مشاعل:يبا ودي افتش؟؟

سلطان:كولي تبن بس واسكتي؟؟

مشاعل:خلنا بس ننزل ونروح للفندق والله لا افتش ,انا بس مابي السعوديين يشوفوني..

..............................


نزلنا من الطياره ورحنا نخلص اوراقناوناخذ شنطنا

سلطان:مشاعل شوفي ذولاك متروعين من شكلتس؟؟

مشاعل: استغفر الله ,الا شكلهم متروعين من خشتك ولا هالرجول اللي تقل محافر؟؟

انا: الله اول مره اشوف شقر على الطبيعه

سلطان:وراهم متلفلفين تقل بعز المربعانيه؟؟

أنا:وانت على بالك رايح لجده؟؟هذي سويسرا بررررررد بكل الاوقات

سلطان:ياربيييييه ليتني جايب فروتي؟؟ وراكم ماقلتوا لي انه برد؟؟

انا:عشان ماتجيب فروتك ,انا اذا لبستها في السعوديه تفشلت وشلون عاد هنا؟؟

سلطان:هين انتي وعصتس اباخذ شراباتس وقبعتس؟؟

انا:اصلن ماجبت قبع على قولتك؟؟ وشراباتي صغيره عليك

ابوي:هاه اغراضكم كامله؟

حنا/ايه ايه

ابوي:اجلسوا انتم هنا وابروح انا وسلطان نجيب تاكسي

أنا:يبا تعرف تتكلم انقليزي؟؟

سلطان :ايه انا اعرف ,والا المركز وش مصبرني عليه انا وعزوز؟؟

ابوي:يله سلطان اخلص؟؟

ركبنا التاكسي ورحنا للفندق..وبالفندق احتسنا؟؟حاجزين لنا غرفتين غرفه سرير نفرين وغرفه سريرين منفرده

ابوي:سلطان انت نطلب لك فراش ونم مع خواتك مايصلح لحالهن بالغرفه..

سلطان: لا احجز لي الغرفه اللي بجمبهن؟؟غرفتنا فيها باب يدخل على غرفه ثانيه بس مقفله؟؟

ابوي:ابشوف انكانها فاضيه ولا تراك بتنام هنا

سلطان كلم الاستقبال وحجز الغرفه و جاب المفتاح وجاء مستانس احسن شي لي غرفه لحالي..

أنا:ايوالله على الاقل نفتك من شخيرك!!

سلطان:يله يله ناموا ياويلكم اسمع لكم صوت

مشاعل: ليتنا جايبين فهد بس بمكانك..



المهم كل واحد راح لفراشه ونمنا نومه عميقه لاننا متواعدين نقوم بدري لنكتشف سحر سويسرا..


.

.

.

.


يتبع

 

[ريا اخت سكينه]

ههههههههههه

ياحلوك والله

بس صدز صدز
هالقصه واقعيه او خيال علمي؟؟؟

 

[جنية إن ذا قوطي]

خخخخخخخخخخخخخخخخ أححححححححححسن شيء حنا أمتس , أها كملي لا تقطعين الجو

 

[تحفه]

والله حسيت أني أطالع مسلسل كوميدي
في أنتظار بقية القصه
يعطيك العافيه

 

[♥ Manolito ♥]

- السلام عليكم ورحمة الله وبركاتهْ ,

يسعد لي مساك

أكملي جزاكِ الله خيرا

< روحي نامي ابرك لك

والله موضوعك جدا كويس وممتع وهالشي خلاني اتفاعل وارد
أكملي ولا ترى مصيره يتصفصف في قلوبنا :$

برب ,

 

[~جغمه توت~]

في الصباح الباكر....



قمنا وغسلنا وسوينا تمارين الصباح<< وتوجهنا لمطعم الفندق.وجلسنا على الطاوله وصب لنا الجرسون الكوفي والالشاهي..

امي/جغمه قومي حطي لي فطور

انا/وش احط لك؟

امي :اي شي بس لا تجيبين لي لحم ما يندرى وش هم يطبخون ذا الاجانب؟؟

انا/طيب قم معي سلطان استحي لحالي؟؟

سلطان/ايه انا ابشوف لي شي على مزاجي ,احسن شي انك تختار فطورك ,موب احد يحدك عليه؟؟

انا/ احمد ربك اللي عندك من يسوي لك ,هذي بحد ذاتها نعمه ماتنجحد

سلطان/لا يكثر بس انا ملاحظ انتس من جينا وانتي على بالتس كلن تعطينه مواعظ؟؟

انا/وش اسوي ربي باليني بكم؟؟

وحنا ندور على البوفيه...سلطان:بالله من يشتهي ياكل بيتزا الصبح!!

انا:بيزا؟

سلطان/ايه شوفي هناك.متاكدين ان هذا فطور ولا عشاء؟؟ماشفت لافول ولا شكشوكه..

انا/خذ بيض وتوست واحمد ربك

سلطان/سويسرا وسويسرا وهم حتى فطور مايعرفون يصلحونه زي الناس!!

انا:ايه عشان لا تجحد طبخ امي

المهم وديت لامي بيض وتوست وكرواسان ومربى..ورجعت احط لي وسلطان مازال يبحث عن الفول..

انا/سلطان اخلص بنمشي راح اليوم وانت تدور على الفول

سلطان:اجل وش تبيني اكل؟؟

انا:كل هالنعم ماجاز لك شي؟

سلطان:ابروح اخذ بيض وجبن وخبز لا بارك الله فيهم وفي شغلهم؟؟

اخذنا فطورنا ورحنا لطاولتنا...وبالطريق جت بنت مزيووونه وطرراخ تصدم بسلطان..

سلطان:عمممممىىىىىى ماتشوووو.......يوم التفت وشاف الوجه الصبوح ومير يبلع لسانه ويسكت

البنت:سوري سوري!!

أنا:نوبروبلم اتس اوكي..

سلطان: ايه ايه اتس اوكي..!!

البنت:وير ار يو قوت ذيس بريد؟؟(تسال سلطان من وين جاب الخبز)

سلطان:اوف ذير ,,آآآآآآآآآ تيك ذيس تيك ذيس؟؟اعطاها خبزته؟؟

انا: والله من الدلاخه,وشوله تعطيها خبزتك؟؟لها رجول تروح تاخذ؟؟

البنت:نو نو ثانكس وراحت جهه الخبز؟

سلطان:انتي بالذات انطمي!! يمكن انها ماتعرف وين بالضبط؟؟

انا:وانت وش عليك منها لو ان شاء الله ما بلعت طول عمرها

سلطان:ايه خلاص انطمي.. (الاخ مفهي مابعد فاق من الصدمه)

انا:هههههههه سلطان وقعت في الحب؟؟

سلطان:اقول سري امها... ودفني قدامه ومشى

أنا:هههههههه وش فيك طيب لاتدف,خلاص عرفنا انك حبيب وتستحي!!

سلطان: لا يكثر!!

المهم افطرنا وطلعنا ندور تاكسي يودينا نتفرج على المدينه الساحره جنيف

أبوي:مريم تشوفين هالبراد ذكرني بسنه المطره بأبها يوم نروح مع اخواني ؟؟

أمي:هووو,تكرم ديارنا عنهم!!ولو انه معطيهم ربي الخضره والبرادات,الا انه مابه بركه؟؟

ابوي:ايييه هذا سلمتس الله جنه الله في ارضه,ربي عطاهم كل شي الا راحه البال..

امي:قطع ,ناه وجيههم مابها نور من الكفر اعوذ بالله!!!!

أنا: ياربيه شكل السفره كلها محاضره؟؟

أمي:وجيه ودره يا جعلكم ماتربحون!!

سلطان:خلاص يمااا,مادروا عنتس لو تحلطمين الى بكرى

ابوي:مااااااااشاااااااء الله شوفوا شوفوا ,مشاعل افتحي الشباك براد..

مشاعل:والله برد يبا يازينه خله يوقف نقطف ورد!!

سلطان:نقطف!!!اوووخص,يعني جيتي لسويسرا وصرتي فجأه رومانسيه!!

انا:خلها تعيش جو بتروح للسعوديه وبتشبع غبار!!

مشاعل: والله انكم بزارين!!

ابوي:صديق صديق,هذا ودي حديقه فيه حديقه قريب!!!!!!!!!!

سلطان:ههههههههههههههههههههههههههههههههههاي يبا حسستني اني جالس بوسط البطحاء؟؟

ابوي: الله يغربلك قل له يودينا لحديقه قريبه,,

سلطان: صديق, كان يو تيك اس تو ابارك؟؟

أنا:ايه صديق الله يجزاك خير..

سلطان:يبا المره الثانيه قله محمد يبي يفهم لك اكثر,...

ابوي:وش دراني عاد وش هرجهم هنا؟؟

رحنا لمنتزه دخوله رمزي بس فيه فعاليات حلوه جلسنا بطاوله وعاد اشكال النظرات صراحه!!

مشاعل :جغمه قومي نتمشى..

انا :اصبري تونا جالسين..

مشاعل:قومممممي بس نلف لفه ونرجع......وتغمز لي بعينها!! وش عندها ذا المهبوله!!

قمت ورحت معها ومشينا وجلسنا على طرف بحيره نتفرج على البط..

انا:وش عندتس تغومزين لي!! تبي تقولين لي سر

مشاعل:يقالتس تميلحين!!

انا:اجل وش تبين..

مشاعل:شوفي وش رايتس نفتش ونتمشى ونشتري ايس كريم وناكله واذا قضينا نرجع

انا: عشان يجي سلطان ويفشلنا!!

مشاعل: وينه هو اذا جينا نرجع تغطينا؟؟

انا:وشوله عاد..؟؟

مشاعل :يختي ودي اجرب شعور المشي بالهواء الطلق وبعدين يكفي الحجاب

انا:لا لا ابوي وامي مايرضون؟؟

مشاعل:احسن خليك اذا رجعنا تندمين..

انا فكرت وهوجست خلني افتش وش فيها؟؟هذا غيري اصلن شايل العبايه؟؟وشوله اعرض نفسي للاحراج وكل هالعالم بس يناظرونا؟؟

انا:يله افتشي انتي وبعدين انا ابفتش

مشاعل:لا لا انتي اول!!

انا:يا كرهتس بس انتي شاطره بالكلام!! /اتفقنا نفتش بنفس الوقت

نزلنا لثمنا وقعدنا نناظر يمين ويسار عسى ما احد شافنا!!

مشاعل :الله يازينه الهواء يضرب خدودي؟؟؟؟؟؟

أنا:ياشينتس انتي وجملتس المفيده!!

مشاعل:وراتس منزله راستس؟؟قرويه!!

انا:قومي بس خل نمشي؟؟مشينا على استحياء واذا مرينا برجال رفعنا حجابنا(مدري وش حادنا)
المهم انا كنت منزله راسي يوم رفعته ولا ذاك الرجال يناظرنا.... انا ضربت مشاعل بكتفي:هيه مشاعل به واحد يناظرنا؟؟

مشاعل:يمااااا لا يصير بس يعرفنا؟؟

أنا:بلا غباء وشلون يعرفتس,يعني انت ذابحتس الكشف بالسعوديه يوم انه كلن بيعرف خشتس؟؟

مشاعل:اجل وراه ذا يناظرنا..

انا:شكله معجب..

مشاعل: تهقينه .؟؟؟

أنا:طسي هناك تكفين!! صدق انتس مراهقه..

مشينا لين وصلناكشك تبيع فيه حرمه كبيره ..انا/مشاعل تبين ايس كريم؟؟

مشاعل/ايه من زمان خاطري به!!

انا:تو فانيلا ايس كريم بليز؟؟

مشاعل:لا انا ابي كاكاو..أنا:قولي ليها انتي
مشاعل ما اعرف وش اقول لها..

انا:ماعلي منتس فشيله اقول لها لا الحين؟؟

مشاعل:اكس كوزمي<<<< التفتت لها الحرمه..قالت:ايام شوكلت؟؟

انا:اما ايام؟؟؟خخخخخخ والتفت على الحرمه:شي وونت اتشوكلت ايس كريم..

عطتنا الايس كريم وحاسبناها ومشينا وحنا نلعط الايس كريم ...

انا:ياسلام مشاعل تصدقين اننا الحين بسويسرا ناكل ايس كريم وحنا فاتشين؟؟

مشاعل:يووووه والله لو احلف لميعاد(صديقتها)عشرين مره مارح تصدقني؟؟

انا:ايه عشانتس دبشه وتقولين لها كل شي!!ماصرتي ذهينه مثلي وبهرتي سفراتنا كان تصدقتس..

المهم استمرينا نهذر ..فجأه اختبصت مشاعل وطاح ايسكريمها....؟؟أنا:وش فيك!!

مشاعل:تغطي سلطان جاء!!

ان تغطيت والتفت :ويييينه!!

مشاعل:هذاه هناك شكله يدورنا..,قمنا لجهته واشرنا له وجانا يمشي بسرعه..

سلطان:وينكم!!لي ساعه ادوركم؟؟

انا:وش تبي؟؟(خرب جونا)

سلطان:ابوي قام يصرفني شكله يبي يقعد مع امي لحالهم؟؟

انا:ايه حياك اللخ رح جب لك ايس كريم وجب لمشاعل حقها طاح

سلطان:ناظر مشاعل:خبله انتي وراه طاح!!

انا:لا بس طقت شراغيه ونزت وطاح منها؟؟

مشاعل:

..........................................

 

[جنية إن ذا قوطي]

ههههههههههههههههههه احلفي أن امتس قالت لتس :_ جغمة جيبي لي فطور !!

 

[♥ Manolito ♥]

- السلام عليكم ورحمة الله وبركاته !

سأكرهكِ حتما إن لم تُكمليْ
لا اعلم لما لم اتعلم من تسحيباتكم ذي إلى الان
برب

 

[~جغمه توت~]

مسائكم ورد وفل..


ومرحبا فيكم فردآ...فردآ...ومعلييييش روقوا وريلاكس تحملوني أنا اكتب اذا كانت قريحتي مليانه واذا كانت فاضيه ..؟؟ ما اقدر اكتب..!!! بلييييييز كوم داون..


.

.

.


رجعنا ذاك اليوم للفندق بدري ..وتعشينا من عندهم ونمنا...في الصباح قمنا بدري ورحنا للبوفيه..

سلطان:جغمه خل نروح للبقاله ..

انا:طيب خل نفطر..

سلطان:عاد من زين هالفطور..

انا:عاد انا معجبني انت ماجربت السينبون حقهم..

سلطان: سينبون الصبح !!لا ذا بس زين مع قهوه المغرب

أنا: احول انت كلش عندك مايوكل الصبح!! ,الله يعينك على نفسك!!

رحت انا اخذت لي سينبون وبيتزا(عشان اقهر سلطان) وافطرت على عجل وقمت مع سلطان للبقاله

وامي وابوي ومشاعل راحوا يتمشون عند الفندق...

رحنا للبقاله,أنا:يوووه مشتهيه برينقليز بنكهه المشوي..

سلطان:انا ابي بيره احس هالبيض يتمشى بمعدتي..

انا: يييع ,الا معك فلوس..

سلطان: ايه معي ابعطيتس خمسه..

انا: ماتكفي اصبر ابروح اخذ من ابوي..

سلطان :يالله بس امشي منيب راجع!!

انا:طيب خمسه ماتكفيني ابشري شوكلاطات لي انا ومشاعل اليوم بنسهر على فلم شفنا دعايته..

سلطان:متى بيجي!!

انا:الظاهر ثنعش
دخلنا السوبر ماركت,,يوووووه مره كبير ومرتب وفيه كل مايخطر على بالك..

انا:سلطان كم معك؟؟

سلطان: آآآآآم معي الظاهر حول الميه..

جيت اباخذ عربيه//سلطان:وشوله العربيه والله شكل الاخت ناويه تضف كل البقاله!!

انا اخذت سله وانا مستحيه من تفشيلت سلطان الغبي!!ومشيت معه ..

سلطان:الله اوما لو هذي بالسعوديه وعند بيتنا...

انا:بس تدري مابعد عرفت شي

سلطان:لا تخافين انتي عندتس حساسات للشكولاته

انا:اصبر تعال نشوف وشو ذا

رحنا لجهه اللحوم ابشوف كيف طريقتهم..!!

سلطان:جغمه!!ناظري هذا..

انا التفت واصعق من منظر مهول قدامي...

يييييييييييييع الله يقرفك , واثره راس خنزير مبرد.. لا وبجمبه كراعينه؟؟؟؟؟؟؟

انا:وشوله رازينه بالثلاجه يماللعمى؟؟

سلطان:عشان يحسحسونه ويطبخونه وياكلونه؟؟؟زينا مع الخرفان

وااااااااااااوك وشلون يقبلونه؟؟

سلطان:ناظري خشمه

انا: يالله بس مشينا انسدت نفسي بلا برنقلز بلا شوكلاته

سلطان :مشينا بس عند الثلاجات ابي بيره

انا:ما اتوقع عندهم بدون كحول

سلطان:لا فيه احول كل من بغا يشرب بيره لازم يسكر!!

رحنا للثلاجات وبصراحه اشكال المشروبات احمر وردي اخضر ازرق... شي جميل.

سلطان اخذ له بيره وقعد يقراها بس طلع كحول 5% //اخذ ثانيه نفس الشي والثالثه 25%

المهم دور الين داخ مالقى شي بدون كحول وحنا ندور جانا واحد تقل مصري قال:الاخوان عرب!!

حنا:
سلطان:ايه نعم

الواحد:كيف حالك تحب اساعدك بشي؟؟

سلطان:انت عربي؟من وين

الواحد:اي انا من المغرب اسمي توفيق وعايش هنا اشتغل في السوبر ماركت كثير اصادف ناس عرب ومن الخليج تحديدا

سلطان:اييييه حنا ندور بيره بدون كحول

توفيق:لا هنا مارح تحصل شي كلو في كحول بس فيه بالبقالات العربيه فيك تروح تلاقي عندهم

سلطان:ووينها فيه هالبقالات؟؟

توفيق:عندك بعد شارعين من هون .......الخ

سلطان:شكرا الله يجزاك خير وفرت علينا الوقت..

توفيق:انتم عرسان.. فيه هون منتجع كتير مناسب وسعره ممتاز لو حبيت ادلك عليه؟؟

حنا:

سلطان:لا لا هذي اختي وحنا هنا مع اهلي..

انا: شفت وشلون شكلك شايب

سلطان:ماعنده سالفه ذا اما عرسان انا آخذ وحده مثل عصتس؟؟

انا:اسواك انا ,تحلم تلقى وحده تجي على نصفي

المهم رحنا لجهه الحلويات شي خيالي شوكلاطات جديده قشيت لي كم نوع واخذت

لي نوع بطاطس يجي معه تغميسه ومشينا رحنا للفندق واثر ابوي لابس شورت سباحه

ويسبح بالمسبح وامي ومشاعل جالسين على الطاوله ..

امي:سلطان رح جب سروال السباحه حقك اسبح ترا لكم لين الساعه ثمان ونص وبيجي التاكسي

بنروح لقريه قريبه فيها شلالات وخضار..

سلطان:لا الحين مابي ابسبح بالشلال

ابوي:والله ماملو الماء بالكلور زي مسابحنا تفتح عيونك بالمويه ماتحرك..

سلطان:يبا انا ابروح للبقاله العربيه الحين فيها بيره بدون كحول تبون شي؟؟

مشاعل:ابي ايسكريم

امي:جب لنا بيره كلنا والله يا عشاهم امس انه قاعد في تسبدي ,كله زيوت

ابوي :رح بس ترفق واذا جاك احد يكلمك لا تصدقه خاصه العرب هنا لا تتعامل معهم ولا تدلهم على مكانك ولا تروح معهم لمكان

سلطان :يا ساتر ليه؟؟

ابوي:يخطفون ويبتزون وبعضهم يسحر وياخذ فلوس الواحد ما دري عنه

سلطان:لا تطمن بدري عليهم

.................................

المهم المسبح كان مكشوف يعني بالطبيعه والمناظر كانت تجنن..

انا:مشاعل خل نصور هنا جيبي الكاميرا

اخذنا الكميرا ورحنا نصور انا ومشاعل صورنا ابوي وهو يسبح وصورت امي وهي تشر لابوي بكل حب وصورت مشاعل وهي تستهبل وصورتني وانا اتميلح وشفنا هناك عائله سعوديه متلثمين..

مشاعل:جغمه خل نتعرف على بناتهم..

انا:يالله قدام..

مشاعل:روحي ناديهم >>

انا:مدري ليه مشاعل احس انتس دايم تستغليني..

مشاعل:وراه!!

انا:يعني انتي اللي مشتهيه تتعرفين عليهم ,ولا تبين كل شي يجي لك جاهز انتي وهالراس!!

مشاعل: ايه انا استحي؟؟

انا: وانا قالوا لك مغسول وجهي بمرق؟؟

مشاعل:لا بس انتي جريئه وكلن تدخلين فيه؟؟

انا:كلن ادخل به؟؟وش قالوا لك جني!!

مشاعل:خلاص ابروح الله يعيني.

انا:ايه روحي لازم تندمجين بالحياه الاجتماعيه وتصيرين كلن تدخلين به!!! <<

مشاعل راحت لجهتهم تمشي خطوه وتاقف تلتفت لي وانا اشر لها بيدي عشان تروح..كملت مشيها

وراحت لهم,واشوفها تكلمهم وتشر علي وانا اتميلح واشر لهم بيدي..قاموا بنتين ومشوا لمي...

ومشاعل وراهم تسولف وهم بس عيونهم علي ,عاد انا قمت وسلمت عليهم وسولفت شوي

قالت وحده :اختك قالت لنا انك تبغينا؟؟

الله يقلع مشاعل داريه انها داجه ومابراسها سنع,وأنا اناظرهابخبث يعني هين والله لا افشلتس..؟

أنا:والله اختي مشاعل لعبت عليكم هي من الصبح تقول تتحدين اكلمهم واخليهم يجون عندنا وانا ماصدقتها لانها انطوائيه وتستحي قلت لها ايه مادريت الا هي جايتكم؟؟

مشاعل: واتوقع انها بينها وبين نفسها تدعي علي!!

البنات:ههههههههههههههههه والله انكم فله!!

انا ومشاعل: هاااه ههههههههههه ايه شفتوا عاد حنا من شفناكم حبيناكم وقلنا اكيد انكم رهيبين..
مشاعل:تعالوا خل نجلس ...

رحنا للكراسي وجلسنا وسولفنا حنا نبهر وهم يبهرون...الين مصخت قلت انا في نفسي وشوله هالتفشخر والمصخره..

انا:واالله الصدق اننا داجين وهذي اول مره نطلع السعوديه!!

مشاعل:

انا:ايه وترى لنا اخوان بس تاركينهم عند جدتي ..

البنات:

انا:ايه جاي معنا اخوي بس انه الحين رايح للبقاله ودهو دايم يلبس رياضه!! اتمنى مستقبلا انه يتطور بس قلت لكم عشان ماتنصدمون!!

البنات:

.

.

.

يتبع قريبا ان شاء الله.

 

[سيده ملعقة]

سلطان ذكرني بااخوي نفس البثاره

يعطيك العافيه ويارب قريحتك ماتفضى ابد عشان مانفقدك ..

كملي ننتظرك

 

[~جغمه توت~]

مراحب كيفكم..

.

.

.

المهم اني جبت العيد مع هالبنتين وقلت لهم كل شي وصاروا هم تدريجيا يفضحون بانفسهم وأنهم مثلنا داجين!!

مشاعل:يعني وشلون اجل جيتوا لسويسرا وانتم قراويه!!(ياشين الميانه)!!

وحده منهم اسمها مها :مثلكم انتم وشلون جيتوا <<مراهقتين يتحارشون!!

انا:تحدث كذا للضعوف اللي زينا ربي يرزقنا من حيث لا نحتسب

من بعيد لاح طيف اخوي سلطان جاي يتبختر ببدله الهلال وزبيريات بيض وهو فاق الخشه مبسوط وبيده اكياس كثييييره..

مها:شوفوا لا يفوتكم ذا العربجي ههههههه لابس بدله الهلال!!

مشاعل: قوموا نروح هناك

أنا: هذا طول الله اعماركم اخوي سلطان اللي جاي معنا..

مشاعل:

البنات:

انا:بس لا تغركم ازيائه تراه اجودي وسنع..

مها:بصراحه اخوكم حلو بس لو اخذه اكشخه يطلع رهيب..

اختها فاطمه: انطمي لا اقول لحمد..؟

مها:وانا وش قلت!!يا شين المعقدين!!!

انا:اذكروا الله ماصار الا الخير ندري ان اخونا زين بس ينقصه التكشخ!!

سلطان ينادينا من بعيد:يااااولد!!<< ,جغمه يالله مشينا التاكسي ينتظر!!

انا:يالله حبايبي حنا بنمشي نشوفكم على خير

فاطمه:هلا والله بس اصبروا خل اعطيكم رقم امي تقدرون تدقون من اي كبينه

أنا:خلاص نشوف مدري انتم فندقكم بعيد؟؟

فاطمه:لا لا شوفيه هذا(واشرت على فندق قريب مرره من فندقنا قلت :انتم جنبنا

خلاص نصير نطلع هنا كل يوم من بعد العشاء نسهر معكم

فاطمه: ايه ماعندنا مانع

انا :اجل يالله الوعد بكرا

ورحنا حنا لقريه قريبه من روما مشهوره بالطبيعه؟؟




بالسياره..

.

.

.

سلطان:منهم ذولا اللي صادقتوهم

مشاعل:ناس قراويه اول مره يطلعون برا السعوديه..

انا وسلطان:

سلطان:وحضرتس من متى وانتي تطلعين برا السعوديه!!

مشاعل: بس هم اكثر قراوه مننا!!

انا:والله الحال من بعضه

التفت على سلطان وقلت:سلطان تدري انهم يقولون انك حلو

سلطان: ايه ماجابو شي جديد؟؟؟؟؟

انا:بس يقولون انك قروي وماتعرف تلبس!!

سلطان:وش دخل ابوهم بلبسي!! هالبنات والله من الفضاوه!!

انا:تو يوم انه مدح باغي تنسدح من الوناسه والحين ششت!!

سلطان: اما ششت ,مادريت عنهن!!

ابوي:مريم شوفي الشلالات هناك

امي:سبحآآآآآآآآن من سواها,يعآآآآآآآآآل يعطينا ماعطاهم...

ابوي: اامين ليتنا جايبين عده شوي

امي:ايوالله نشوي ونتغدا ونكسر بياله الشاهي والى منه اقبل المغرب رجعنا!!

سلطان:نقدر يبا اقول للسواق يوقف عند سوبرماركت!!

انا:ايه يبا تكفى من زمان عن اكل السعوديه!!

سلطان:المشوي اكله يعرفها كل العالم مو بس السعوديين!!

انا:داريه بس اقصد انه شي نعرفه..

ابوي:قل له يوقف عند سوبر ماركت به كل شي

سلطان التفت على السواق واتفق معه انه يوقف باول سوبر ماركت بالقريه اللي رحنا لها..وهي فيها كل شي..

مشاعل:يبا ابنزل معك للسوبر ماركت

سلطان:انثبري بس بنجيب الاغراض ونجي

ابوي:انت وش فيك متسلط عليها خلها تجي

مشاعل:

أنا:عاد انت وش عرفك بعدة الطبخ؟؟

سلطان:والمشوي اللي تبلعينه كل جمعه من اللي يسويه

انا:ابوي

سلطان: ابوك يالجحده!!

.

.

.

وصلنا للقريه وكانت شيييي ورحنا للسوبر ماركت كلنا نزلنا حتى السواق

امي:به بوهه من كارفور هالسوبر ماركت

انا:يما خل نروح قسم اللحم ندور دجاج (بيني وبين نفسي قلت ابوري امي راس الخنزير)<<تكرمون

قلت لمشاعل تمسك الكاميرا وتصورنا وحنا نتسوق بس ابوري خالاتي ردت فعل امي لما تشوف الخنزير!!<<اكرمكم الله

انا:يما تعالي من هنا

امي:اذا مافيه حلال بناخذ سمك

انا:ايه تعالي يمكن هنا فيه واوديه لقسم البورك<<تكرمون واسوي نفسي توي اشوفه

انا:يمااا وععععع وشو ذا!!

امي: اعوووووووذ بالله من الشيطااان الرجيم قطع من ابليس واهله!!

مشاعل:ومعها الكاميرا:وشو وش تناظرون

انا:تعالي صوري

امي:خلوه من هالشوفه,يا جعلكم ماتربحون ,ايه يهود ماينشره عليكم

مشاعل شافته يععع وش ذا لا يصير بس خنزير!!

انا:الا هو بعينه

مشاعل:يمااآآ,اول مره اشوفه على الطبيعه!!

انا:لا تكفين وينهو به بتشوفينه يعني بالعثيم!!!

مشاعل:انتي وش عندتس مستانسه؟؟معجبتس ذا هو وخشمه؟؟

..


المهم طلعنا من السوبر ماركت وراح بنا السواق لمكان مأنتك!! ياخذ العقل فيه بحيره

صآآآآفيه وشلال صغير والمكان كله اخضر /والجو كان خيالي غيييييييم وفيه رش خفيييف وشوي

يوقف,,فرشنا الفرشه البلاستك شريناها من السوبر ماركت وجلسنا عليها واللي راح يتمشى...










يتبع...

 

[~جغمه توت~]

في تلك الاثناء كانت اختي مشاعل تدور على نفسها زي افلام كرتون عايشه جو رومانسي

وتغني اغنيه كاظم حبيبتي والمطر وانا وامي رحنا نتمشى ..ولحقتنا مشاعل بعد ماخلصت من وقت

الرومانس؟؟

انا:الله يجنن الجو

امي :ايوالله ماشاء الله عسى يعوضنا بالجنه

مشاعل:يما ودنا نسبح جايبين ملابس السباحه

امي :اخاف البحيره عميقه

مشاعل :بنجرب وانكانها عميقه مارح نبعد..

امي:خلاص حتى انا من زمان ما سبحت

جمعنا حطب معنا وجينا طبعا لقيناه مرمي بالارض.. ولا مانقدر نقطع شجرهم

رحنا لفرشتنا ولقينا ابوي وسلطان داقينها سوالف مع السواق(طبعا شايب سويسري اشقر مره طيب)

يوم رجعنا هو راح للسياره وطله من شنطتها ثلاث كراسي اللي تنصفط وقال لابوي وسلطان يجلسون معه وانا وامي وشعول جلسنا على الفرشه..

امي:والله يعرف يوجب هالامريكاني

انا: امريكاني؟؟يما مو كل الشقر امريكان

امي:ايه كلهم يهود وش الفرق!!

انا:لا يعني زينا حنا المسلمين كل شعب لهم دوله المصاريه بمصر والسواريه بسوريا...وهكذا.

امي: ياحبك للقرق بس

انا:وش دعوه يما

مشاعل قامت عند ابوي وقالت له نبي نسبح قل للسواق يدلنا على مكان مافيه تماسيح

سلطان:اما تماسيح رايحين اندونيسيا حنا!!

مشاعل:المهم ابي مكان مابه شي يخوف وما ابيه عميق

ساله سلطان وودانا بين شجر كثيف طلعنا على بحيره هاااديه وصغنونه وفيها شلال صغير

السواق:طبعا بالانقليزي:هذي البحيره امنه وحتى على الاطفال وتقدرون تاخذون راحتكم مافيه احد

رجعوا الرجال وحنا شلنا العبايات وطبينا بالبحيره وكانت مره باره المويه

وسبحنا وطافشنا ولعبنا صراحه السباحه في المياه الطبيعيه ...وااااو

مشاعل:جغمه صوريني وانا انط من فوق

انا:يالله بس انتبهي لا يطلع صروالتس

مشاعل: عاد خوذي صور مضحكه خل اهبل بميعاد!!

انا:يالله طسي طبي

واخذت لها صور كثيره بس احسن شي يوم وصلت الماء ودخلت فيه ومو مبين الا رجولها من الركبه وتحت وصوره وهي مسويه بيدها اني ابطب زي اللي يجون بمسابقات السباحه

وهي صورتني وانا تحت الشلال..وهيك صور ..

خلصنا سابحين وطلعنا لبسنا ورحنا مااش جوع رحت انا وطلعت الشيبس اللي شريته وفليناها مع بيره شاريها سلطان من البقاله العربيه..

المهم الرجال شووا الدجاج وحنا شرينا صحن سلطه من السوبر ماركت وتغدينا وشربنا الشاهي ويوم قرب العصر رحنا سبحنا ثانيه والرجال سبحوا بعد العصر ليييييييييين مشينا

بطريق العوده
.

.

.

مشاعل :ياسلااااام اليوم مرررره استانسنا

ابوي:حنا هذا اللي نبيه انكم تنبسطون

انا:ياحبي لك يبا عسى الله يخليك لنا

امي:آآآمين

سلطان:والله انا دااايخ ابي فراشي

ان: وراك ترى فيه فلم اليوم مرره شكله حلو

سلطان:ماله اعاده!!

انا:مدري ما اظن

...................................


وصلنا الفندق وتروشنا وامي وابوي قالوا بيروحون يتقهوون بمطعم الفندق وانا ومشاعل رحنا للباحه حقت الفندق عشان مواعدين البنات وسلطان نااااااام

رحنا انا ومشاعل وجلسنا بالساحه نتفرج على الناس,اللي هو حبيبته واللي هي وصديقتها واللي مع بزرها....اشكال والوان

مشاعل:ياليت نصير كل سنه نجي هنا

انا:يابنت الحلال احمدي ربتس انا كنت اقول اكيد اني ابموت وانا ماشفت الدونيا

مشاعل:لا شكل ابوي مستانس ان شاء الله كل سنه بدوله

انا: لا تشطحين واجد بس

تأخروا البنات علينا وحنا ودنا نرجع بدري عشان نشوف الفلم

مشاعل:هذولا مصخوها حنا قلنا على الساعه سبع والحين ثمان الا

انا:يمكن ظروفهم منعتهم خل نجلس الى ثمان ونص واذا ماجو مشينا

مشاعل:جغمه شوفي هناك عندهم كنتاكي؟؟

انا:ايه هو عالمي بكل العالم تلقينه..

مشاعل:خل نتعشى منه اليوم

انا:ما انغثيتي من المشوي

مشاعل:ايه بس بعد ساعتين بنجوع...

شوي الا نشوف البنات جايات مسرعات ..

مها:اشوا مارحتوا

انا:لا قلنا بنعطيكم لين ثمان ونص

فاطمه:كله من ذي هي وخشتها قالت لابوي بنروح نسهر مع صديقاتنا وهو يحسب اننا بنجي بفندقكم

مها:عاد احسن من اللي بتطلع بدون ما تشاور

انا:اشوا طيب وش خلاه يطيع؟؟

فاطمه:حلفنا له اننا بنجلس بساحه الفندق

.

.

.

جلسنا نسولف ونعلق ونضحك ليييين تسع ونص...وحنا جالسين مروا ثلاث شباب شكلهم سعوديين وقاموا يتميلحون علينا بس حنا مشينا وخليناهم قلنا للبنات تعالوا شوفوا مسبحنا

ورحنا لفندقنا بس تحت ووريناهم المسبح وعجبهم فندقنا وجلسنا على الكراسي ..

مشاعل:جغمه اروح اطلب عصير؟

انا:اقعدي بس ناقصين بعد ضياع وحاله

حنا جالسين ما درينا الا هالصوت اللي يقول:هآآآي ذيييير

وجا يتمايل من عندنا تقل بيدوخ؟؟

مشاعل:يماا شكله سكران

انا:ايوالله

مها:يماا تكفون تعالو ودونا بس لفندقنا..

فاطمه:قومي قومي نروح عاد اذا ودونا من يرجعهم!!

قامو هم راحوا لفندقهم وحنا وقفنا لهم لين شفناهم دخلو ورحنا حنا للغرفه..

.

.

.

يتبع بكرى الصبح

 

[سيده ملعقة]

راح بكرا الصبح وبعد بكرا الصبح ولا تُبع وينك

 

[جنية إن ذا قوطي]

وراكم رحتوا قرية فريبة من روما الخبر أنكم بسويسرا , لا تصيرون زرقتوا لإيطاليا ؟؟

يلا تكفين عجلي علينا عسى بس المانع خير , بس المرة الثانية لا تتريقين على بدلة الهلال ترا لبسهم الثالث كوشخة قولي لسلطان يكشخ فيه ؟؟؟

 

[~جغمه توت~]

والله فشله منكم ,ماعاد اتسذب ثانيه!!بس صادفتنا عزومه طارئه تستلزم سنع شنيع


اممم جنيه!! لا تدققين يا بنت انا ابقول جنيف وخانني التعبير..<<لا تعودين لها تفشليني!!



.

.

.

مالكم بالطويلي..

حنا رجعنا لفندقنا والبنات لفندقهم,وبس دخلنا الغرفه ,وبسررررعه للتلفزيون وندور فلمنا

مشاعل:جغمه لا يصير خلص؟

انا:لا هو مكتوب عشر ونص لسا باقي ربع ساعه.

مشاعل:ياربييييه جوعانه ابروح لامي وابوي فوق اتعشى معهم

انا:اجلسي بس لا تضيعين ترى هنا فيه عصابات وشر,يخطفونتس بذا الليل من بيدري عنتس

مشاعل: مالي دخل طيب جوعانه..

أنا:ايه اصبري اذا جو امي وابوي يطلبون لنا بالغرفه

وحنا نتناقش مادرينا الا ذا الشوشه تويق علينا ,سلطان قام من النوم وجا يتخبط..

سلطان:بدآآآآآ الفللللللللم

انا:بسم الله الرحمن الرحيم من وين طلعت..

سلطان:والواحد يقدر ينام من لجتكم!! المهم بدى الفلم!!

انا:لااا ,يبدا عشر ونص

سلطان راح فتح ثلاجتنا:حشى مار هنا سرب جراد؟؟؟وين اللي كان بالثلاجه

مشاعل: اكلناه كله

سلطان:خفي على نفستس انتي بتطقين!!

انا: ياشين اللي ينام المغرب ويقوم غلدز <<(من الغلقه)

سلطان:وش تعشيتوا

انا:ماتعشينا مثلكوش رايك تروح تجيب لنا عشا قبل يبدا الفلم

سلطان:مامعي فلوس

انا:انا معي

سلطان:ابفهم من وين لتس الفلوس انتي

انا:عسى الله يخلي لنا الحكومه ذخر راتبي جعلي بعدك ابباشر لك انت واختك!!

سلطان:طيب وش اجيب؟؟

انا:فيه حولنا كنتاكي

مشاعل:انا ابي مطافي

سلطان :احلفي!!ماعندهم هنا مطافي.

مشاعل:وش عرفك؟؟

سلطان:امس متعشي هناك

انا:جب لنا اي شي ينوكل

راح سلطان جاب لنا عشا وجلسنا نتفرج على الفلم وكان يهبل صحنا شوي وضحكنا شويات وسلطان غير القناه كم مره(تشفيرا لبعض المشاهد)؟؟<<مسوي اخلاق هو واذانه!!


من بكرى كنا متفقين نقوم بدري بنروح لزيورخ بالقطار ..

ابوي:يالله ياعيال قوموا تاخرنا بيمشي القطار...

انا:قمت بسرعه ورميت مخدتي على مشاعل:قومي راحوا عننا..

مشاعل رفعت راسها:سلطان قام؟؟

انا:لا ابروح اصحيه

مشاعل:خلاص اذا قام وعوني..

انا رميت عليها قوطي ببسي فاضي:قومي وجع ابوي يحترينا برا

ورحت غسلت ودخلت غرفه سلطان اصحيه واثره قايم وبالحمام...

بالتاكسي.

.

.

مشاعل: ياسفابها جنيف مره حبيتها

انا:يمكن زيورخ تصير احسن

وفي القطار ,,

سلطان:والله هالعالم فاضيه وش مجهشهم من صبح الله!! وتثاوب!!

ابوي:كلن يدور رزقه بس ماشاء الله عليهم كلن طالع من بيته وابتسامته ماليه وجهه ليت ابو سليمان يشوف

مشاعل:لا تروح لابو سليمان شف هاللي جمبك

سلطان:لا يكثر وتثاوب!!

جلسنا كلنا قبال بعض امي وابوي بكرسي وانا ومشاعل وسلطان بكرسي وكل شوي وحده لهادور تجلس عند الشباك

جابو لنا فطور مكون من بيض وتوست وجبن سويسري وعصير برتقال وقهوه تركيه كل واحد له هالمجموعه..

افطرنا وجلسنا نخطط وين بنروح وكذا..

سلطان:ترى ملينا يبا من الطبيعه نبي مولات وسينما

امي:وشو!!سينما!!اعوذ بالله

سلطان :ايه الله اكبر هذانا نشوف الافلام بالبيت

امي:ايه الشكوى لله بهذي ماقويتكم بس السينما لا!!

سلطان:يما,انكانا لقينا ترانا بنروح!!

امي:يالله صباح خييير

ابوي:لا اله الا الله خلاص ,سلطان لا تحاج امك..

,...................................

وصلنا زيورخ وبصراحه متعه السفر بالقطار لا تنسى خاصه المناظر اللي شفناها

ركبنا التاكسي وللفندق دايركت وعلى طول تروشنا ونمنا..

قمت انا المغرب جوعااااااااانه...رحت لغرفه امي وابوي وطقيتها..

امي :من!!

انا: انا جغمه!!

امي:ادخلي مفتوح الباب..

دخلت انا وجلست بكرسي جمب امي:يما ليه مخليه الباب مفتوح؟؟

امي:توه طالع ابوك راح للاستقبال يجيب نشرات..

انا:يما انا جوعاااااااااااانه

امي :الحين بنطلع نتعشى بس خلي خوانك يقومون..

طق الباب ورحت افتح حسبته ابوي طلع سلطان ومشاعل..

سلطان:وينكم قومتني ذا الخبله تصيح تقول اهلي راحوا وخلونا؟؟

انا:سلامات مشاعل؟؟

مشاعل: وانتي وشوله تطلعين ماقلتي لي؟؟

امي:تعالي بسم الله عليتس ,وراحت مشاعل خمت امي تصيح؟؟

التفتت على سلطان:من جدها ذي ؟؟؟؟

سلطان: مدري عنها هبلت فيني..,يما جوعان!!

امي :يالله روحوا البسوا بنطلع الحين..

جاء ابوي ورقفنا تاكسي وركبنا..

سلطان:كان يو تيك اس تو ايتاليان ريسترونت؟؟

ابوي:وش قلت له؟؟

سلطان :قلت له ياخذنا لمطعم ايطالي

ابوي:طيب شاورنا اول

سلطان :يبا كلنا نحب الاكل الايطالي..

امي :ايه انا مشتهيه فوتوشيني زين نذوقه من طباخين غير هالفلبينيين اللي عندنا

وصلنا لمطعم شكله من برا عادي بس من جوا حلو وطلبنا نوعين مكرونه ونوعين بيتزا وسلطه وتعشينا

كان اكلهم لذيييذ

سلطان:شكل المولات الحين مسكره؟؟

انا:خل نسال السواق!!

يوم ركبنا سال سلطان السواق وفعلا صارت تسكر ست مالنا الا نطلع بكرا بدري..

رجعنا للفندق بس جلسنا نتمشى برا جمب الفندق وقال ابوي:تعالوا ابعزمكم على عصير ماحصل

ورحنا لفندقنا وجلسنا بجلست الاستقبال وابوي راح يجيب عصير..

الا وتمر ذيك الشقراء الحمرا لابسه ذاك التنوره اللي بنص الفخذ؟؟؟وراحت لعند ابوي تطلب ...

امي: هو .... وش تبي ذي........ وراها راحت عند ابوكم؟؟

انا:يما يمكن تبي تلزق فيه؟؟

قربت الحرمه لابوي وكلمته وابوي تخوبل شوي وقام يتكلم ويشر علينا والحرمه التفتت واشرت لنا..

امي:يماا للقصم ورى ماتذلف

انا:يما الحقي روحي لا تخطف قلب ابوي؟؟

امي: وقامت بتروح لهم بس كان ابوي راجع..

ابوي:

امي:وشوله تهرج مع هالخواجه؟؟

ابوي: والله ماهرجت هي تسالني وانا قلت لها نو انقليش؟؟ذيس ماي فاميلي

امي: اشوا هذي الهقوه يبو سلطان..

سلطان:يبا اروح اشوف وش كانت تبي؟؟

امي:انثبر بس..

.

.

.

شربنا عصيرنا ورحنا لغرفنا ننتظر يوم غد بلهفه...



يتبع..

 

[سيده ملعقة]

وبعدين

 

[™ τиτя]

.






-~
انسسسسجمت وبقوه
أسلوبك روعه وممتع يوسع الصدر
كملي يارعاك الله ..