تنورة روان

[صفرة المغرب]

السلام عليكم يا ابنائي الاقوياء.....

قصتنا اليوم ستدور داخل دولاب ملابس روان ...>> معليش سلكوا.. الكاتب{ مداخل } ما سموه كذا من فراغ...

كان الظلام حالكاً داخل الدولاب والهدوم نايمييين ..كانت الساعة حدعش وعشر ليلاً...ما دروا

الا يسطع خيط من الضوء الباهر يتسع شيئاً فشيئاً......الزبدة انفتح الباب..>>راوي شايب عصبي


وشوي دخلوا عليهم ملابس غريبة..اشي ذهبي واشي قصير واشي مقصقص ...وتسكر الباب..

.الملابس المستنكرة: هاي قايز

الملابس القديمة: ...نعم ؟؟ طيب سلموا!

ردت الملابس المستنكرة بقلة حيا يوووه....ذولي شكلهم قلق سلموا لا تسلمون....شكلهم حقين

اخت روان...

لا محناب حقين اختها ...حقينها....بعدين وش هالاشكال؟؟ من شاريكم لها؟؟

لا ياشيخة>> الملابس القديمة كانت تنورة سوداء طويلة فيها كسرة من وراء

هي اللي شاريتنا...بعدين وش فينا...احنا على الموضة يا قروية.....

قمطت التنورة وبغت تصيح بس قالت..الحمدلله ..والتفتت

بعدين قالت معقولة روان تشتري كذا ؟ اكيد بتلبسني تحت هالبلوزة المايقة..الله يعين على الملاغة..

يابلوزة ..يا بلوزة ذهبية...

التفت الشي الذهبي ..تقصديني؟؟ انا فستان..وش تبين!

نعم .. فستان لمين؟؟ لأن شكلك موقد احد من اهل البيت كلهم طوال..قد لبستني ريم يوم..

قاطعها الفستان..ياليل الزلايب...انا لروان بعدين كثر الهذرة موب زين>> يظل الذكر ذكر حتى لوه فستان

التنورة من هول الصدمة فقت خشتها..>>تتوقعون وين موقع الخشة في الثوب
المهم ما علينا...

يا الله وش غير الدنيا...روان!...تصدق هذي كانت ملتزمة..مبلشة بنات المتوسط بالمحاضرات في المصلى وقت الفسحة...والحين تلبسك وشلون!

طلت تنورة قصيرة من المستنكرات...شكل اللي تحكن عنها غير خويتنا...حقتنا بلثمة وحركات ما تركب على المحاضرات..اسمها رواااان..

ايه انا راعيتي روان..بس كانت تلبس قفازات!

هي الحين في اي سنة؟؟

رد الفستان بحمق : مدري عنها توها شارينا!

سكتت التنورة...لقد مر وقت طويل منذ آخر مرة لبستها روان....اييييه دنيا خسيسة >>تحسون التنورة بيئة شوي

قررت ان تعود للنوم وتترك الدرعى ترعى .....


**************************


استمر هالموال...ملابس مشخلعة تخش.....وملابس مسترة مسحوب على والديها...

خويتنا التنورة السوداء معد صبرت... رمت نفسها على ارض الدولاب ...تبي روان لا شافتها

تذكرها وتلبسها>>وهذا يفسر الملابس المتساقطة في غرفتك عزيزي القارئ هي من يرمي نفسها والا انت وش حليلك

المهم فتحت روان الدولاب ورأت التنورة...فرفعتها برقة...قائلة....يووووه...من وين طلعت ذي؟

ماتوا اللي يلبسون كذا ....شكلي باعطيها نور>>الشغالة...

ما تتصورون شعور التنورة..بس كله يهون عند صدمتها في شكل روان..

الكشة ممشخة السقف...وغدت عصاقيل ما فيها انسة....ونامصة مدري حالقة مدري وش مسوية....

افااااا.....وشلون صرتي كذا؟؟

حطت روان التنورة على السرير>> طبعاً ابو نفرين من اللي تبطي عظم تنوم فيه تباري الساس
وانسدحت واخذت البي بي...وكلمت نااااس...وقالت هوايل...

التنورة خلاص ..صكها راسها..لو تقدر ركضت ولبست نور...

انهت روان المكالمات...وسحبت التنورة...وحطتها على الدربزين...نووووور تعالي خوذي هذا تنورة حقي انتي انا ما فيه ابغى...

وصعدت نور...واستلمت العهدة

************************************************** **

ظلت صاحبتنا التنورة في غرفة نور ...تسمع اخبار روان من باقي الملابس اللي يبي لها كوي...

ودار الحديث التالي

وش مسوية هي الحين؟

ابد ..على حطة يدك البربرة في التلفون...والاغاني ..والملابس حقت الرقاصات....

لا حول ولا قوة الا بالله....يعني ابافهم...وش قلب حالها كذا؟؟؟

خوياتها يا بنت الحلال....تبي تصير زيهم...يحسبون الكشخة في التفصخ

طيب بس معقولة ما لها راي...والله لو انهم غاسلين مخها غسل ما سوت كل هذا...

وحانت منها التفاتة على شيء اسود مطرز ومفصص..

هذا فستان ام خالد؟

لأ...عباية روان...

لا اقصد المطرز...

ايه هذي عباية روان

...عباية؟؟؟اييييه الشكوى لله ....الله يهديها وبس


************************************************** ********


بعد فترة ...انقفطت روان...خويها اللي زبد لها ..وقال يا تطلعين معي والا افضح والدي والديك نفذ كلامه لما سحبت عليه وصارت تسكر الخط لا اتصل...

وصل الموضوع لاهلها...بس الحمدلله..كل شي اهون من شي...ما راحت له مثل هالشياه وقالت ابانهي الموضوع بمعرفتي..

طبعا انرضت وانحبست ...
تستاهل..
.بس احسن ما في الموضوع انها دخلت غرفة نور تفتش..ولما سألتها نور وش تبين...

قالت..انتي معلوم هذا تنورة اسود انا اول كلام مايبغى؟؟

وينها الله لا يخلينا




تمت يا ابنائي...روحوا للحمام وارقدوا..........

 

[جنية إن ذا قوطي]

خخخخخخخخخخخخخخخخخخخخخخخخخخخخ هذي كلها سواليف ملابس , والله إني حللت هذر أم جيرانا عند هذرهن !! ما شاء الله على خيالك الخصب , ومار يومنها أخذت التنورة من نور وش سوت ؟؟

 

[صفرة المغرب]

هلا والله حياك اختي ........ما تلاحظين اسمي واسمك لايقين على بعض...اللي يراكض فيني تطلعين له

بالنسبة لسولافتي...يعني البنت صارت مطوعة مرة ثانية.....توقعتها مفهومة..اثري سبيكة


نورتي ومشكورة يا بطلة...الله يقاصرنا واياك بالاحسان

 

[البســــوس]

وحانت منها التفاتة على شيء اسود مطرز ومفصص..

هذا فستان ام خالد؟

لأ...عباية روان...

لا اقصد المطرز...

ايه هذي عباية روان

...عباية؟؟؟اييييه الشكوى لله ....الله يهديها وبس

هههههههههههههههههههههههههههههههههههههههههههههههههه عجبتني بقوه

اجل تحسبه فستان ام خالد
ياحيف بس على فساتين اول المطرزه وام ترتر بعد ماكانوا يلبسونها في الاعرااس صارت تنلبس في السوق

عافاك ياصفرة المغرب

 

[$ جـــوري $]

ههههههههههههههههههه ماابي احلف انك هي << وحده ببالي موب التنوره ..

تدرين لو موضوعك ذا بالعائلي او بطريقة ثانيه بالفكري كان الى اليوم وحنا نفك الشوش ..

وانسدحت واخذت البي بي...وكلمت نااااس...وقالت هوايل...

مدري ليش ضحكت حسيت هاللقطه تقولينها بسرعه ماودك تقولينها ..

طيب تتوقعين وش علاقة اللقطه اللي قلتيها بسرعه باللبس ؟؟

خخخخخخخخخخخخ بس حلوه ترجع تاخذ التنوره من الشغاله ..

طريقة جديده وحلوه بالنصح ..
مع اني مدري ارد عالموضوع الاساسي والا عالقصه ..
والا كيف ارد ..

مير موب لازم ..
بس حبيت اقول حياك اختي صفره المغرب " بسم الله " .. ولاتوقفين ..

 

[المنقهر]

رااااااااااااااااااااااااااااااااااائعة


اسمحي لي اهنيك على هالقصة الجميلة جدا جدا جدا



خرافية بكل تفاصيلها هالقصة


والله مدري وش اقول لك , من جد يا بنات ,,,, إننا نتألم من اللي تسوونه في أنفسكم من تفصخ وإنحلال ,,,


الله يعطيك العافية ويجعلك ذخر لكل من انتي تصيرين ذخر له <--- يا ادع زي الناس والا لاتدعي تكف


شكرا صفرة المغرب

 

[ra7al]

7
7
بعيد عن الفضايح الي تصير في الشارع احنا منجبرين نلبس زي الخلق ولا بنصير مضحكه تخيل نلبس تنوره طويله .!؟ قسم كل مجتمع البنات ينبذونها حتى الميدي ما عاد مودرن الله يستر بس كم سنه ونصير زي حريم اول نفصل ما نلاقي شي يسترنا في السوق

الملابس القديمة كانت تنورة سوداء طويلة فيها كسرة من وراء

احسبها انقرضت

تذكرها وتلبسها>>وهذا يفسر الملابس المتساقطة في غرفتك عزيزي القارئ هي من يرمي نفسها والا انت وش حليلك

ايوه اشوى انا كنت حاسه حتى ما يطيح الا اخس الثياب

ماتوا اللي يلبسون كذا ....شكلي باعطيها نور>>الشغالة...

:)

هذا فستان ام خالد؟

لأ...عباية روان...

لا اقصد المطرز...

ايه هذي عباية روان

...عباية؟؟؟اييييه الشكوى لله ....الله يهديها وبس

ههههههههههههههههههههههههههههههههه



يعطيك الف عافيه

 

[المنقهر]

بعيد عن الفضايح الي تصير في الشارع احنا منجبرين نلبس زي الخلق ولا بنصير مضحكه تخيل نلبس تنوره طويله .!؟ قسم كل مجتمع البنات ينبذونها حتى الميدي ما عاد مودرن الله يستر بس كم سنه ونصير زي حريم اول نفصل ما نلاقي شي يسترنا في السوق

يعني نغضب الله عشان ماينبذونا الناس ؟

عموما هذا الكلام عندي رد على هذا الكلام من محمد بن عبدالله صلى الله عليه وسلم : ( بدأ الإسلام غريبا وسيعود غريبا كما بدأ فطوبى للغرباء ) .

يقول الشيخ عبدالعزيز بن باز - رحمه الله - في شرح الحديث :

حديث صحيح ثابت عن رسول الله عليه الصلاة والسلام.
زاد جماعة من أئمة الحديث في رواية أخرى:
قيل يا رسول الله من الغرباء؟ قال الذين يصلحون إذا فسد الناس
وفي لفظ آخر: الذين يصلحون ما أفسد الناس من سنتي
وفي لفظ آخر: هم النزاع من القبائل
وفي لفظ آخر: هم أناس صالحون قليل في أناس سوء كثير .
فالمقصود أن الغرباء هم أهل الاستقامة، وأن الجنة والسعادة للغرباء الذين يصلحون عند فساد الناس إذا تغيرت الأحوال والتبست الأمور وقلَ أهل الخير ثبتوا هم على الحق واستقاموا على دين الله ووحدوا الله وأخلصوا له العبادة واستقاموا على الصلاة والزكاة والصيام والحج وسائر أمور الدين، هؤلاء هم الغرباء، وهم الذين قال الله فيهم وفي أشباههم: { إِنَّ الَّذِينَ قَالُوا رَبُّنَا اللَّهُ ثُمَّ اسْتَقَامُوا تَتَنَزَّلُ عَلَيْهِمُ الْمَلائِكَةُ أَلا تَخَافُوا وَلا تَحْزَنُوا وَأَبْشِرُوا بِالْجَنَّةِ الَّتِي كُنْتُمْ تُوعَدُونَ نَحْنُ أَوْلِيَاؤُكُمْ فِي الْحَيَاةِ الدُّنْيَا وَفِي الْآخِرَةِ وَلَكُمْ فِيهَا مَا تَشْتَهِي أَنْفُسُكُمْ وَلَكُمْ فِيهَا مَا تَدَّعُونَ نُزُلًا مِنْ غَفُورٍ رَحِيمٍ } [فصلت: 30-32] . ما تدعون: أي ما تطلبون.

 

[المنقهر]

ومني انا

ليت هالتفصخ على شي يسوى

يا دبة فخوذها كبر قريح , وإلا نحيفة عصاقيل تقل ملاعق يابانيين , اللهم لك الحمد والشكر بس .

 

[ra7al]

7
7
ما خرجنا لله الحمد من اطار المباح بس تدري وش المشكله

انو كل فتره يزود المباح حبتين عند بعض الناس اللين يخرج عن كونه مباح

 

[صفرة المغرب]

اغط شوية واعود القى موضوعي مثبت .......كفو كفو يا عسى يده ما تشل اللي ثبته>> واضح الناس الملحطة اللي اول مرة يتثبت لها شي

حياكم كلكم اناثي وذكراناً.......

البسوس اتشرف اختي بحضورك....مشكورة..سمي


الوري....حياك نورتيني بس انا شنب ....بعدين اللي ما ابي اقوله كلكم عارفينه والاااا


بس وش رايكم في الاسم راكب على ملتزمة؟؟


المنقهر....يا هلا والله ومسهلا...>>يدق التحية ....صغرت طاقيتي ....كبرت راسي يا طويل

العمر بمرورك وتشريفك العطر......لي الفخر ان السوالف نالت رضاك.....بس ليش ما حسيت اني

شب مشورب المفروض الدم يحن>> وش يبي ذا

يعني عشان الواحد مؤدب ويقول توني بقراطيسي منيب متفلت تستوطون حيطته؟؟ لازم يسفل باهل

اللي خلفوكم يعني؟؟>>ايييييه توهق الثور .....لا لا تمونون....

حياك الغالي هااااك


رحال..>>>ما لي خلق اكتبه زيك ..

لا وانا اخوك لا تصيرون سبايك....كلما لبسوا هالملاحيس تلبسون مثلهم .....

يعني هم يقولون خاربة خاربة....لا دين ولا تربية وكل ساقط له لاقط....

بس انتم بنات حمايل>> شايف دفتر العايلة

لا صحيح يعني ابوها احسن الناس وامها احسن الناس والبنت كنها داخلة كباريه ليش؟؟

محد ماكلها الا انتم هي العنوسة قت من شوية؟؟....

ما قلنا لا تكشخون اكشخوا بالمعقول المقبول...>>لله دري ما ابهاني

ادري بتقولين وش يبي ذا مسك خط......بس مدري حبيت افضفض محد معطيني فيس في محيطي>>الاخ اخطبوط

حياك ومشكورة على المرور.......لا تخافين منيب قايل مرور والا شرطة

ايه صح خذي ............عشان ما تقولين اشمعنى انا .....

 

[النشبه]

لا ياشيخة>> الملابس القديمة كانت تنورة سوداء طويلة فيها كسرة من وراء

رجعتيني لحدعش سنه لورا
اجل ام كسره كنت ذاك الوقت اتمنى البس تنوره سوداء طويله وفيها هالكسره بدال المقنزع اللي كنت البسه

وللمعلوميه رجعوا لها الحين بس حطوا الكسره قدام وقصروها شوي


معليش رحال

بعيد عن الفضايح الي تصير في الشارع احنا منجبرين نلبس زي الخلق ولا بنصير مضحكه

محد مجبر انه يسوي مثل الناس المتفتحين على قولتهم .. لان رضاهم غاية لا تدرك

وفيه حديث لرسول الله اللهم صلي وسلم عليه : من التمس رضا الله بسخط الناس رضي الله عنه وارضا الناس عنه ، ومن ارضا الناس بسخط الله سخط الله عليه واسخط الناس عليه

واللي عقله براسه يعرف خلاصه


يعطيك العافيه صفرة المغرب .

 

[صفرة المغرب]

هلااااااا بالنشبة....حياك.......يا اختي غلبت وانا افهم فيكم انا ذكرررر....طلي على موضوعتس

سدير ومدري وشو >> وش بلاه ذا؟؟

اييييه صرتي من قوم التنورة ؟؟ شفتي ان بنات افكاري معهم خبر.....>> يا حليلهم كبروا الحين وتغطوا عني

حياك يا المؤدبة........صدز السديراويات غير...>>يريش

........دوتس (بتفهمينها هماتس لاطتها في قاموستس والا انا غلطان(خخخخخخخخخ

 

[$ جـــوري $]

ههههههههههههههههههههه يوه فشيله ..
ومن زود الصدق شاكه بوحده معينه بعد ..

معليش يااخوي ,, السموحه ..
لعطه ودريشه من قبلك وللحين يدفعون ثمن التاء المربوطه ..

ليت هالتفصخ على شي يسوى

لعلمك هالنوعيه من البنات " اللي يشوفون الكشخه بالتفصخ " تكون عندهم ثقه بالنفس زايده عن حدها ..
ولاتفكر اذا هالشي يصلح لها ولا لا ..!
واصلا اللي براسها فكرة انها تلبس هاللبس وانه هذي هي الكشخه مهوب رادها انه شكلها مايصلح ..
ولاتدري انه هالعالم اللي هي ينقال كاشخه لهم ,, متقرفين ويحترونها متى تطلع من المجلس ..

والسنوات الاخيره ماعاد يردهم شي ابد يالله لك الحمد " وش عندها العجيز " ..
قبل كانوا اذا في المجلس حرمه كبيره والا وحده ملتزمه يحترمون او يخافون او يستحون " البعض طبعا " ..,
يعني اللي مايردعها الدين كان يردعها الحيا اوالخوف .. هالحين وش يردعهم ؟؟

اعرف وحده فضّحت اخرى عند الله وخلقه لأنها لابسه تنوره ميدي " يعني الى نص الساق تقريبا لغير الناطقين بذا اللغه "
وسبحان الله سنه وتجي ذي نفسها لابسه تنوره فوق الركبه ,,

اللبس من فتن هالزمان .. عشان كذا ودك مانتكلم في الناس ابد ..
ونقول الله يهدينا ويثبتنا ..

ويهدي الجميع ..,


ومره ثانيه شكرا اخوي صفرة ..

 

[ra7al]

النشبه وصفره والمنقهر بعد

حسبي الله عليكم طلعتوني بزر موب فاهمه شي

يا جداني موب قصدي لازم انا رحل البس زي العالم ((مفصخ )) لاع اللحين زي التنوره السوداء ام كسره يا نشبه بتلبسينها .!؟< اتحداك

يعني نساير العصر غصب عنا فهمتوني وكل هذا في اطار المعقول واطار الدين قبل كل شي

كثير منا يلبس سكيني تنوره قبل سنه وهي وع بس الكل يلبسها وكانت الموضه في ذيك الفتره

فهمتوني .!؟

وهذا مقطع من كلام انو احنا بنسير اللين يصير المسايره حرام
7
7

الله يستر بس كم سنه ونصير زي حريم اول نفصل ما نلاقي شي يسترنا في السوق

 

[صفرة المغرب]

اهلا ب >> يعني الحوري......ما اقدر اكتب اول حرف من اسمك الكي بورد خربان ... حتى لو لاحظتي حاولت ما اطريه في الموضوع كله........وش تقولين سودااااني....باصلحه اليوم...

لا عادي تصير في اكبر العوايل .....والمرأة ليست شيئاً ناقصا...بالعكس نتشرف فيها>>> ليش متفلت على العالم دامه عادي .....

نورتيني للمرة الثانية ........

 

[صفرة المغرب]

رحال...معليش حشرناك .....
بس القصد مو انتي بشخصك........القصد اللي يلبسون كذا وعادي عندهم....>>بعدين محد قال لك

تصيرين المحامي عنهم وتقولين وش نسوي ومدري وشو .......بيرقعها اعماها...

حياك وولكم باك ولا عدمناك و يلله مناك

 

[تباري السآس]

وقفوا لي ترى بجي وأرد بس مدري متى..؟؟..

^

 

[بتول]

ههههههههههههههههههههههههههههههههههه

هههههههههههههههههههههههههههههههههههههههههههه

هههههههههههههههههههههههههههههههههههههههههههههههههه هههه


ممتع جدا جدا

حياك ربي صفرة المغرب (أعوذ بالله )

ولا فيه ابطل من كذا دخله

 

[العبقري]

يا دبة فخوذها كبر قريح , وإلا نحيفة عصاقيل تقل ملاعق يابانيين , اللهم لك الحمد والشكر بس .

هههههههههههههههههههههههههههههههههههههههههههههههههه ههههههههههههههههههههههههههههههههههههههههه
هههههههههههههههههههههههههههههههههههههههههههههههههه ههههههههههههههههههههههههههههههه
هههههههههههههههههههههههههههههههههههههههههههههههههه ههههههههههههههههههههههههههههه

هههههههههههههههههههههههههههههههههههههههههههههههههه ههههههههههههههههههههههههههههه


... يعطيك العافية صفرة .. موضوع شيق ّ بشد القااف . ..

وسلمي على روان

 

[صفرة المغرب]

هلا والله BTL .......يسعدني جداً اني رسمت هالبسمة.....دوم ان شاء الله...

حياك ونورتني اخوي..

 

[صفرة المغرب]

العبقري......يا مرحبا ومسهلا........شبي المدخنة ياروان >>لأن شكلك تحتك بها.....

شرفني مرورك..........سلمت لك على روان ... فانحاشت .......والنحشة علامة الرضا

عاد نبي الشياب يتمون الموضوع رسمي عقب مغرب الجمعة...>>ما فينا شدة كلافات

تحس اني مسكت خط؟؟؟؟؟؟؟؟خخخخخخ

سي يو ....

 

[ARoMa]

ماشاء الله قصه جميله ,, وفكرتها بطله
لو منك احولها لقصه قصيره للاطفال

بس احسن ما في الموضوع انها دخلت غرفة نور تفتش..ولما سألتها نور وش تبين...
قالت..انتي معلوم هذا تنورة اسود انا اول كلام مايبغى؟؟
وينها الله لا يخلينا

يا مال الفقر كان اشترت وحدة جديدة والا لها الدرجة التنوره السوداء ام كسرة صارت عملة نادرة

يعطيك العافية صفره المغرب

 

[صفرة المغرب]

اهلين فيك اختي........ARoMA

مشكورة.....انا كاتب قصص للاطفال وبالرسومات بعد >> هذا اللي ما ينمدح يبلش خلق الله..

صدق عندي خرابيط موزيها لعيالي وكلها هادفة >> اللي يقراها ما يصدق ان اللي كاتبها الفقير

الى ربه>> مهوب اللي على حصن المسلم وهف مدري وشو لااا واحد فقير ثاني


بالنسبة لروان.......هي تبي تغتنم الفرصة قبل يلعب عليها بليس وتهون...مثل ما لعب علي وقال اكتب قصص اطفال


شرفتيني.........سمي

 

[تباري السآس]

جيت..<<عاد لاتجحد كل هالذوق وقل الله يحييك..

والله قصه خرافيه..يعني يكفي فكرتها انها ملابس تسولف مع بعض..

الله بس يثبتنا ومانطير في العجه ونشخلع في ملابسنا..

حطت روان التنورة على السرير>> طبعاً ابو نفرين من اللي تبطي عظم تنوم فيه تباري الساس

هههههههههههههههههههههههههههههههههههههههههههههههههه هه

ههههههههههههههههههههههههههههههههههههههههههههه

ان عاش راسي بحقق امنيتي ان شاءالله بس بدون قلق شياب..

بانتظار جديدك..

بس لحظه عندي تعليق بسيط..خارج اروقه هذا الموضوع..<<مايمديكم على اروقه

هلا والله BTL .......يسعدني جداً اني رسمت هالبسمة.....دوم ان شاء الله...

حياك ونورتني اخوي..

 

[صفرة المغرب]

اهلاااااااااان تباري الساس حياك الله الفٍ تزيد مية........

اخيرا جيتي..الله واكبر يا هالاشغال....اصلح سنبون اصلح مدري وشو ويا ليته زين بعد يابس

خسارة مقادير على الفاضي لو نشتري بقيمتها جاهز اصرف من حواق هالبني

شرفتيني اختي وفالك السرير >> نرجو مراجعة موضوع الاخت عشان لحد يفهم غلط

........BTL حرمة؟؟؟........آسف والله ما كنت ادري.........كاتبين اديب حركي ان كان كتبتوا اديبة

حركية...الله يهديكم..........

سمي انتي وهي....

 

[تباري السآس]

شرفتيني اختي وفالك السرير >> نرجو مراجعة موضوع الاخت عشان لحد يفهم غلط

اشوا انك وضحت والا كان جوا المدرعمين وقالوا اني قاعده اتميلح واتجاوز الحدود..

 

[بتول]

المشاركة الأصلية كتبت بواسطة صفرة المغرب

هلا والله BTL .......يسعدني جداً اني رسمت هالبسمة.....دوم ان شاء الله...

حياك ونورتني اخوي..

 

[صفرة المغرب]

اخوي المنقهر حاولت ارسل لك رسالة خاصة بس يقولون لازم يصير عندك 50 مشاركة

بالنسبة للموضوع ذاك وذاك ....ما عندنا الا حلالك يالغالي سو اللي تبي.....

شرفتني........